شەڤ و هاتن
زوهێر كورەماركی
هەكە ئەڤ شەڤە تۆ هاتی
ئەز دێ هشیار مینم
دێ چاڤا كەمە هەیڤ و
رۆناهیێ بارینم
هەست و هەناسا
دێ كەمە گولاڤ ل بەر پێن تە ڕەشینم
دا گرنژینێ ل سەر لێڤێن تە بچینم
دێ پەیڤا كەمە گلواز و رستك
ب كل و كلدانی باش خەملینم
دێ كەمە ستۆڤانك و دستۆیێ تە ئالینم
دێ هیڤیا كەمە هەناسە و كەنی
لێڤێن تە پێ گرنژینم
تو وەلاتێ عەشقا منی
ئەز خوە دناڤ هێلینا تەدا مەزن دبینم
لەوما گەلەك هیڤیا ل سەر تە دڤەهینم
وەرە پەریشانم
دارا عەشقێ چاڤەرێ یە!
دا بەرهەمەكێ خۆش ژێ بهەلینم
هندی هند ئەز حەز ژتە دكەم
ب چ دەڕبرینا نەشێم دەڕببڕم ؟
سەرو رویه و سمبێلا دێ ل سەرتە سپی كەم
حەتا حەتایێ دێ ل هیڤیا تە مینم !
چونكی تو ژیانی !
ئەز ژیانێ دچاڤێن تەدا دبینم؟
ئەرێ دچاڤێن تەدا دبینم
