فائیز عەدنان: پشتەڤانێن زاخۆ گیانێ باسكێت بۆلا ئیراقێ ڤەگەڕاند
د داخویانیەكێ دا فائیز عەدنان شاكر ئەندامێ فدراسیۆنا باسكێت بۆلا ئیراقێ پەسنا ئامادەبوونا پشتەڤانێن یانەیا زاخۆ د یاریێن وێ یێن خولا وەرزێ ئەڤ سالە دا كر، ئەڤچەندە هات پشتی ب دووماهی هاتنا خولێ ئەوا یانەیا زاخۆ ل ڕێزا دویێ ل سەر ئاستێ ئیراقێ هاتی.
زێدەتر ناڤهاتی گۆت: فدراسیۆنا باسكێت بۆلا ئیراقێ و هەموو وەرزشڤانێن ڤێ یاریێ سپاسییا پشتەڤانێن یانەیا زاخۆ دكەین ئەوێن دیاركرن پشتەڤانی نە بتنێ بەرهەڤبوونە د ناڤا یاریگەهێ دا بەلكو ڤیانە و وەفادارییە، ئەوا د ماوەیێ خولێ دا مە دیتیی جهێ حێبەتیێ بوو، سەرباری نە وەرزێ ئێكێ یە دبینن لێ وەرزێ ئەڤ سالە ئێكجار پشتەڤان بەرهەڤبوون نە بتنێ ل زاخۆ بەلكو ل بەغدا ژی و دیاركرن كو ئەون جوداهییا خالان چێدكەن و مۆرالا یاریزانان بلند دكەن، هەر كەسەكێ ل سەر شاشەیێن تلەفزیونێ و تۆرێن چڤاكی یاریێن زاخۆ دیتبا گەلەك كەیفخوەش بوو.
هەروەسان ناڤهاتی گۆت: ب ڕاستی ژی پشتەڤانێن زاخۆ گیانێ باسكێت بۆلا ئیراقێ ڤەگەڕاندە ژیانێ، مە گەلەك یاری هەبوون لێ دەما دبوو یارییا زاخۆ بەرانبەر هەر یانەیەكێ پەلۆكێن یاریگەهێ پر بوون ژ پشتەڤانان و خۆشییەكا دی دا یاریێ، هەوە نامەكا بەرچاڤ دا پشتەڤانێن هەموو یانەیان كو ل یاریگەهێ ب وەفاداری و گیانەكێ وەرزشی بەرهەڤبن، پشتەڤانێن زاخۆ نە بتنێ پشتەڤانێن یانەیا خوە بوون، بەلكو هێز و مۆرالا خولا ئیراقێ بلندتر كر و پشتەڤانێن خولێ بوون و جوانیەكا دی دا وەرزێ ئەڤ سالە.
