قووناغا چارگۆشەیا زێڕین دێ دەستپێكەت و سەنحاریب یا بەرهەڤە
فدراسیۆنا ڤۆلی بۆلا ئیراقێ ڕاگەهاند سوبەهی دێ دەست ب هەڤڕكیێن قووناغا چار گۆشەیا زێڕین یا قارەمانییا ئیراقێ ل سەر ئاستێ پێشكەڤتیان بۆ كچان ل باژێڕێ سلێمانیێ هێتە كرن و یانەیا سەنحاریب نوونەرا پارێزگەهێ و قارەمانا وەرزێ بۆری پشكدارە.
لدۆر ڤێ یەكێ ویسام ئەسیر ئەمیندارێ گشتی یێ فدراسیۆنێ گۆت: پشتی د قووناغا كۆمبوونا دا ل دهۆكێ قارەمانی ب سەركەفتیانە ب ڕێڤەچوو مە بڕیار دا ل هەرێما كوردستانێ بمینیت و ئەڤچارە ژی ل سلێمانیێ بدانیت ئەوا دێ شەش یانە د قووناغا چارگۆشەیا زێڕێن دا پشكداربن ئەوژی هەر ئێك ژ سەنحاریب- قارەمانا وەرزێ بۆری، ئەكاد عەنكاوە، ئەفرۆدێت، قەرەقووش، ئەمانەت بەغدا و دەربەندیخان، یاریێن وان دێ بۆ ماوەیێ حەفتیەكێ بەردەوامبن ب شێوەیێ خول، هەروەسان بڕیار هاتە دانا خولەكا ڕاهێنانێ یا نێڤدەولەتی ل 22 هەتا 24ێ ڤێ مەهێ ل دیوانیە بهێتە كرن.
لدۆر بەرهەڤییێن یانەیا سەنحاریب داوود ڕەبەن سەرۆكێ یانەیێ گۆت: ئەڤە بۆ ماوەیێ زێدەتری دو حەفتییە تیما مە بەردەوامە ل سەر ڕاهێنانێن خوە یێن رۆژانە ژبۆ قارەمانییا ئیراقێ و ئارمانجا مە پاراستنا ناسناڤێ مە یێ وەرزێ بۆرییە سەرەرەایی ئەركێ مە ب سانەهی نابیت، لێ مە باوەری ب شارەزاهییا ڕاهێنەر و یاریزانێن خوە هەیە كو دێ شێن گەهنە هیڤیێن مە.
بۆ زانین تیما سەنحاریب د قووناغا كۆمان دا شیابوو چار سەركەفتنان ل سەر هەر ئێك ژ یانەیێن قەرەقووش، ئەمانەت بەغدا، مەسافی ئەلشیمال و ئەلسیاحە بینیت ب كۆمكرنا 12 خالان سەرێ لیستا كۆما خوە بهێت.
