كوردستان د باوەشا سوبەهیەكا چاڤەڕێكری دا
خـالد ئـەحمەد بـادی
پەیوەندیێن تاكێ كورد و تەڤایا كوردستانیان ب بۆیەرێن دەڤەرێ ڤە، دو چەمكن یان دو گیانن د لاشەكی دا، كو د هەمی قووناغێن بۆین دا و قووناغێن دهێن گرێدانەكا موكوم پێكڤە هەیە، گرێدانا تاك و جڤاكان و گرێدانا تاكی ب بۆیەران ڤە، نەخشەیێ رۆژهەلاتا ناڤەراست، ب تایبەت ژ ئالیێ جوگرافی جیۆسیاسی ڤە دیارە, راستیا بۆیەرێن رۆژهەلاتا ناڤەراست و سیاسەتێن لێ دهێنە پەیرەوكرن، ئەڤە یە كو زلهێز و دوژمن هەردەم پلان و پیلانا دادنن، هەر ل دەستپێكا قووناغێن دیرۆكێ د هەمی چەرخان دا ب تایبەت د ڤان قووناغێن نوكە یێن هەستیار كو بەرژەوەندیێن بالا و جیهانگێریێ لاپەڕێن دیرۆكێ ڤەداینە و شاپەڕێن خۆ كرینە سیهوانە ل سەر هەر وارەك و بۆیەرەكێ كو كونترۆلا هەر تشتەكی كرینە و قانوونا دارستانێ پەیرەو دكەن یێ بهێز یێ بێ هێز دخۆت، ڤان پرسان كارڤەدانێن بەرچاڤ ل سەر هەر بۆیەرەكێ دیاركرینە، هەمی جیهان ب تایبەت رۆژهەلاتا ناڤەراست یێ د دەمژمێرێن ڤەشارتی و هەستیار دا دژین، سەبارەت دیرۆكا هەڤركیێن ل رۆژهەلاتا ناڤەراست, ناهێتە ڤەشارتن كو رۆژهەلاتا ناڤەراست دەم و دەمژمێرێن ب سەهم ترس و مەترسیدار دبۆرینیت، هەردەم پرسیار دهێتەكرن، بۆچی ل رۆژهەلاتا ناڤەراست بۆیەرێن نەخۆش یان رەوشەكا خراب هەیە؟ ئەڤە وێ چەندێ دیار دكەت كو هێزا بەلانسێ و هێزا ئابۆری هەردو د دەڤەرا ناڤبری دا هەنە، لەوما ئاراستە زۆر بەر ب دەڤەرا رۆژهەلاتا ناڤەراست ڤە دهێن، د ناڤا ڤان هەمی كێش و دابێشان دا بێگومان كوردستان ب كوردان ڤە د ناڤدایە كوردستانێ بەردەوام قوربانیێن زۆر مەزن داینە كوردستان بوویە بەلانسا زۆر پرسان و كورد شیایینە كیان و هەبوونا خۆ بپارێزن د ناڤا پتریا گوركێن دەڤبخوینێن هەرێمی و یێن ناڤخۆیی دا, وەكو مە ئاماژە ل سەری پێ دایی كورد هەردەم بووینە قوربانی د هەمی قووناغان دا، جاران بووینە قوربانیێن ئایینی، جاران بووینە قوربانیێن مەزهەبی و جاران ژی بووینە قوربانیێن سیاسی ئابووری ل دەڤەرێ، لێ پەیاما مە د ڤان قووناغان دا فەرە كورد لۆبیەكێ ب هێز دروست بكەن، هەر دیسا ئێكگرتنەكا موكوم هەبیت ل گەل بۆردەك یان كۆمەلەكێ كوردی یێ بەرفرەه كو هەمی پارچەیێن كوردستانێ بەرانبەر ڤان هەمی پرسێن گرنگ رابوەستن، بلا كورد ب تنێ بەرژەوەندیێن خۆ بپارێزن كورد سیاسەتەكا نیڤ ـ نیڤەیی ئانكو مامەلێ دگەل دۆست و دوژمنان بكەن و كارتا بەرژەوەندیان بكاربینن ل بەرانبەر هەمی ئالییان، ئانكو كورد ژی بەرژەوەندیێن گشتی یێن كوردستانی بپارێزن دا كو كورد مینا جاران نەمینە د دیكێلا شەمەندەفڕا دەمی دا، كو هەر جار شەمەندەفرا گشتی بتنێ دیكێلا خۆ بۆ كوردان دهێلیت و مە جه د ناڤا كورسیك و فارگۆنێن شەمەندەفرا جیهانی دا نامینیت، پەیاما مە بۆ تەڤایا وان كەس و لایەنێن حەز رۆل ڤیان و شیان هەیی بۆ كوردستانێ كو سیناریۆیا جاران نەزڤریتە ڤە كورد بلا ڤێ دەلیڤا نوكە كو دەلیڤەكا زێرینە ژ دەست نەدەن و خۆ ل گەل بارودۆخ و رەوشێن نوكە بگونجینن دا كو نەمینین د دویكێلا شەمەندە فرا دەمی دا.
