محەمەد ئدریس عومەر: ل ئیراقێ بوومە قارەمان، ب ئومێدم ئالایێ كوردستانێ د قارەمانیێن نێڤدەولەتی دا بلند بكەم
د دیدارەكێ دا محەمەد ئیدریس عومەر یاریزانێ تیما یانەیا دهۆكێ بۆ یارییا MMA یا هەڤڕكییا یاریێن چەنكی- هونەرێ شەڕی و بەرەڤانییێ شیا ڕێزا ئێكێ ل سەر ئاستێ ئیراقێ بۆ كێشا +90 كگم ل سەر ئاستێ تازەپێگەهشتییان پشتی شیایی سەركەڤیت ل سەر هەڤڕكێ خوە یێ یانەیا نەفت میسان ب دڕبێ ئێكلاكەر، د هەڤڕكیێن واندا ئەوا ئێكشەمبییا بۆری ل باژێرێ زاخۆ هاتبووكرن و تێدا 300 یاریزانێن یانە و ئەكادیمیێن كوردستانی و ئیراقی پشكداربووین.
زێدەتر ناڤهاتی گۆت: پێخوەشحالم ئەز شیایم د ئێكەم پشكدارییا خوە یا قارەمانییا ئیراقێ دا ب گەهمە یارییا فینالێ و میدالییا زێری وەكو قارەمانا بۆ كێشا خوە یا +90 كگم ب دەستڤە بینم، پێنەڤێت ئەڤ ناسناڤە ب سانەهی نە هاتییە، بەلكو پشتی زەحمەتەكا درێژ تایبەت پشتەڤانییا ڕاهێنەرێ من ئەوێ هەموو بزاڤ دكرین ئەز باشترین شێوە بهێمە دناڤ قارەمانیێ دا، ڕاستە ئێكەم پشكداری بوو لێ یا سەرفەراز بوو و بەرهەمدار بوویە، ئەڤە پێنگاڤا ئێكێ یا ئیراقێ من هاڤێژت و بوومە قارەمان لێ دڤێت باشتر خوە ماندی بكەم و ئاستێ خوە باشتر و بهێزتر بكەم ژبەركو چاڤێ من دێ ل پشكداریێن نێڤدەولەتی بیت.
ل دووماهییێ محەمەد ئیدریس سۆپاسییا ڕاهێنەری و خێزانا خوە كر كو بەردەوام هاریكار بوون و گۆت: پێنەڤێت هەردەما پشتەڤانی هەبیت یاریزانێ كورد بێ منەتە بۆ هەڤڕكییا هەر ڕێزەكی و سەركەفتنەكێ، هیڤییا مە ژی ئەوە یانەیێن مە یێن وەرزشی و بەرپرسێن وەرزشی پشتەڤانییا مە بكەن و ب ئۆمێدم ئالایێ كوردستانێ ل قارەمانیێن جیهانی ژی بلند بكەم.