مێهڤانداری
سندس سالح سلێڤانەیی
مێهڤان ل دەف مە ل دەڤەرا بەهدینان، نە بەس كەسەكە دهێت و دچیت، بەلكو مێهڤان بەرەكەتە و خودێ یێ بۆ مە فرێكری و د كەڤندا دهۆكیان دگۆتن: مێهڤان مێهڤانێ خودێ یە، لەوما هەر دەمێ كەسەك قەستا مالا مە بكەت، پێدڤییە ئەم ب ڕویەكێ گەش و ب دلەكێ ڤەكری پێشوازیێ لێ بكەین. سەرەدەری دگەل مێهڤانان ل دەف مە ب چەند تشتەكان دەست پێ دكەت، یا ئێكێ ژ وان ژی ئەوە كو تو ب چاوا بخێرهاتیێ لێ بكەی، وەك تو بێژیێ: سەر سەران و سەر چاڤان هاتن، یان مال یا تە یە و ئەم مێهڤانێن تە ینە.
دەمێ مێهڤان دڕوینن، نابیت ئەم بێ دەنگ بین یان تەلەفونێن خۆ بكار بینین، لێ یا دروست ئەوە ئەم مژوولی دانوستاندن و پەیڤێن خۆش بین، ل دەڤەرا مە، تشتێ هەرە گرنگ ئەوە كو مێهڤان هەست ب غەریبیێ نەكەت وچا و قەهوە و فێقی، ئەڤە هەمی نیشانێن كەرەمێ نە، بەلێ یا ژ وێ گرنگتر ئەوە كو تو ب كەیف و خۆشی سەرەدەریێ دگەل بكەی، هەكە مێهڤانی دڤێت خوارنێ بخوت، پێدڤییە باشترین تشتێ مە هەبیت ل بەر دانین، نە ژ بەركو ئەم دخوازین خۆ ل بەر دیار بكەین، بەلكو ژ بەر كو ئەم قەدرێ وی دگرین.
هەروەسا نابیت ئەم ل دەف مێهڤانی بەحسێ ئاریشەێن مالێ یان گرانیا ژیانێ بكەین. مێهڤان دهێت دا كو دەمەكێ خۆش بۆرینیت، لەوما پێدڤییە ئەم ب بتنێ دانوستاندنێن مفادار و كەیفخۆش ل بەر دانین، ل سەر خوارنێ ژی، مە دهۆكیان رەوشتەكێ جوان یێ هەی، ئەو ژی ئەوە كو ئەم زێدەتر مێهڤانی هاندەین بۆ خوارنێ و بێژینێ: دەستێ خۆ نەپارێزە، مال یا تە یە.
سەرەدەری دگەل مێهڤانان نیشانا ڕەسەناتیا مە یە. مێهڤان دێ چیت و دێ پەیڤا خۆش ل دووف خۆ هێلیت، هەكە تو یێ ب كەیف بی و ب ڕویەكێ گەش پێشوازیێ لێ بكەی، ئەو دێ زانیت كو تو كوڕەك یان كچەكا ب ئەسل و فەسلی، ژیانا مە هەمی یا ب ڤان پەیوەندییان ڤە گرێدایە و هەر مێهڤانەكێ دهێتە مالا مە، رەنگەكێ دی یێ جوان ددەتە جڤاكێ مە. لەوما بلا هەر دەم دەرگەهێن مە د ڤەكری بن و دلێن مە ژ دەرگەهێن مە مەزنتر بن بۆ هەر كەسەكێ قەستا مە دكەت. قەدرگرتن ل مێهڤانی، قەدر گرتنە ل خۆ و ل وان بەهایێن جوانێن كو مە ژ باب و باپیرێن خۆ وەرگرتین و ئەم پێ د ناڤدارین.
