مەناف خەلیل: دهۆكێ شیانێن مێڤانداریكرنا قارەمانییێن نێڤدەولەتی هەیە
د داخویانیەكێ دا ئەندامێ فدراسیۆنا ڤۆلی بۆلا ئیراقێ پەسنا پارێزگەها دهۆكێ كر ب هەبوونا ژێرخانەیا وەرزشی و دۆپاتكر كو شیانێن مێڤانداریكرنا قارەمانییێن نێڤدەولەتی ژ هەیە، ئەڤچەندە هات پشتی ل مەها بۆری یانەیا سەنحاریب ل باژێرێ دهۆكێ مێڤاندارییا قووناغا ئێكێ یا خولا ئیراقێ ل سەر ئاستێ كچان كری ئەوا ب پشكدارییا 10 یانەیێن هەرێمێ و ئیراقێ بۆ ماوەیێ پێنج رۆژان یا بەردەوام بوو.
زێدەتر مەناف خەلیل گۆت: مە پێشبینییا سەركەڤتنا پرۆسەیا بڕێڤەبرنا قارەمانیێ ل پارێزگەها دهۆكێ دكر ژبەر هەبوونا خالێن گرنگن یێن دبنە ئەگەرێ ڕێكخستنەكا سەركەڤتی ب هەبوونا ژێرخانەیا وەرزشی، سەقایێ گۆنجایی و باژێرەكێ جوان كو شاندێن هەموو یانەیان خوەشی ژ ڤی باژێری دیتیە، دیسان هەڤكارییا بەردەوام یا بەرپرسێن حكومی و وەرزشی بۆ سەرئێخستنا ڤێ قارەمانیێ ئەگەرەكێ دی یێ سەركەڤتنا قارەمانیێ بوو.
ژلایەكێ دووڤە ناڤهاتی ئەوچەندە ژی دیاركر لدووڤ نەخشەیێ پێشتر بۆ وەرزێ نوو هاتییە دانان قووناغا ئێكێ دێ ل پارێزگەها دهۆكێ بیت، قووناغا دویێ كو دبیتە چارگۆشەیا زێرین پارێزگەها سلێمانی هاتیە دەستنیشانكرن، لەوما ژی دێ ل دووڤ نەخشەیێ چین، سەرباری كو حەز هەبوویە چارگۆشەیا زێرین ل دهۆكێ ژی بەردەوام با، ژبەركو ل پارێزگەهێ ژێرخانەیا وەرزشی و هەر خالەكا گرنگ دناڤ دا هەیە ب هەموو باوەرییا خوە دۆپات دكەم دهۆكێ شیانێن مێڤاندارییا قارەمانییێن نێڤدەولەتی ژی هەیە، ئەم دەستخوەشیێ ل بەرپرسێن پارێزگەهێ و یانەیا سەنحاریب دكەین كو رۆلەكێ مەزن د سەركەڤتنا ڤێ قارەمانیێ دا هەبوویە.
بۆ زانین كچێن یانەیا سەنحاریب شیان د كۆما خوە دا چارسەركەڤتنان ل سەر ئێك بینن بەرانبەر هەر ئێك ژ یانەیێن قەرەقووش، ئەمانەت بەغدا، مەسافی ئەلشیمال و یانەیا ئەلسباحە و ڕێزا ئێكێ بهێن ب كۆمكرنا 12 خالان، قەرەقووش ب جووداهییا تۆماركرنا خالان ژ ئەمانەت بەغدا ڕێزا دویێ هات و دەربازبوو، د كۆما دویێ دا هەردو یانەیێن ئەكاد عەنكاوە ژ هەولێرێ وەكو خودانا ڕێزا ئێكێ ب 12 خالان و دەربەندیخان ژ سلێمانیێ ب نەهـ خالان ڕێزا دویێ هاتن و دەربازبوونە هەمان قووناغ.
