ناكۆكییێن پۆستان ژڤانێ وەرزێ نوو پاشئێخست
قەیس وەیس:
پشتی دەست ژ كار كێشانا سەرۆك و سێ ئەندامێن دی یێن فدراسیۆنا باسكێت بۆلا ئیراقێ، كارڤەندانێن مەزن د ناڤا چادەیا وەرزشا ڤێ یاریێ ل پشتخوە هێلایە و گەهشتییە وێ ڕادەیی ناكۆكی بۆ پۆستێن ڤالا بهێتە كرن و ژڤانێ وەرزێ نوو بهێتە پاشئێخستن.
فدراسیۆنا باسكێت بۆلا ئیراقێ داخواز ژ دەستەیا گشتی یا فدراسیۆنێ كرییە ب نڤێسارێن فەرمی كو ل كۆمبوونەكا تایبەت بەرهەڤن ژبۆ دەستنشانكرنا سەرۆك فدراسیۆن و كارگێرییا نوو یا فدراسیۆنێ ب شێوەیێ هەلبژارتن پێخەمەت بڕێڤەبرنا كار و چالاكیێن وان و دانانا ژڤانەكێ نوو یێ وەرزێ نوو بۆ خولا ئیراقێ پشتی ژبەر ئەوان دەست كاركێشانا هاتیە ڕاوەستاندن، دهێتە چاڤەڕێ كرن د ڤێ حەفتییێ دا ژڤانێ كۆمبوونێ بهێتە دیاركرن بۆ دانانا هەلبژارتنان ئەڤ چەندە هات ل سەر گڤاشتنێن فدراسیۆنا نێڤدەولەتی FIBA بۆ ئەنجامدانا هەلبژارتان هەكەر نە دێ تووشی سزایان بن.
حەمزە عوبێد ڕێڤەبەرێ تەكنیكی ل فدراسیۆنا باسكێت بۆلا ئیراقێ بۆ ئەڤرۆ دیار كر ئەڤ كاودانە دڤێت زووترین دەم دا ب دووماهی بهێت، ڕەوشا باسكێت بۆلێ یا خربە و كارتیكرنا وێ ل سەر ئاست و چالاكیێن مە كرییە، بڕیارە بوو ژڤانێ خولێ بهێت دیاركرن لێ ژبەر دەست ژ كاركێشانا پرانییا ئەندامان هاتە ڕاوەستاندن، هەلبژارتییێ ئیراقێ ژ دێ بەرهەڤییان بۆ ڤاڤارتنێن ئاسیا دەربازبوون بۆ مۆندیالێ كەت لێ ژبەر كاودانێن نوكە ئەو ژی هاتیە ڕاوەستاندن.
بۆ زانین د. دیار محەمەد سەدیق سەرۆكێ فدراسیۆنێ، عەلی عەبد ئەلئەیمە و سورا سەعەد ژلایێ لژنەیا ئۆلمپییا ئیراقێ هاتینە دوورئێخستن، دووڤدا هەر ئێك ژ د. محەمەد رەحیم جێگرێ سەرۆكی، د. فائز عەدنان و حەسەن ئەكرەم ئەندامێن فدراسیۆنێ دەست ژ كارێ خوە بەردان ژبەر ناكۆكی و ئاریشەیێن جودا.
