نشتەرگەریا نازوورێ بۆ پەنجەشێرا قۆلۆنێ؛ ئێشەکا کێمتر و چاکبوونەکا بلەزتر
د سالێن دووماهییێ دا، پێشڤەچوونێن تەکنۆلۆجیا پزیشکی شیاینە گۆڕانکاریێن مەزن د ڕێکارێن نشتەرگەریێ دا چێبکەن، ب تایبەتی د چارەسەرکرنا نەخۆشیێن گران وەک پەنجەشێرا قۆلۆنێ. نشتەرگەریا نازوورێ (لابرۆسکۆپ) وەک پشتبەستنەکا نوو و پێشکەفتی جهێ نشتەرگەریێن نەریتی و برینێن درێژ گرتتییە، کو هەم دۆز د قۆناغێن چاکبوونێ دا گۆهورییە و هەم ژی ئاستێ ئازارێن نەخۆشان بەرەڤ کێمبوونەکا بەرچاڤ برینە.
د. مصطفی شکری المفتی، تایبەتمەندێ نشتەرگەریا گشتی، دیار دکەت کو نشتەرگەریا نازوورێ ڕێکارەکێ گەلەک پێشکەفتییە. د ڤێ تەکنیکێ دا، ل شوونا بڕینا درێژ و ڤەکرنا زکی وەک د نشتەرگەریا کەڤن دا دهاتە کرن، نۆشدار تەنێ چەند کونکێن گەلەک بچووک دکەن کو چەند میلیمەتران دەرباز ناکەن. ب ڕێیا ڤان کونکان، کامیرەکا هوور کو وێنەکێ ڕووهن و سێ ڕەهەندی ل سەر شاشەکێ نیشا ددەت، دگەل ئامرازێن تایبەت دهێنە د ناڤ زکی دا، ئەڤە ژی ڕێ ددەتە نشتەرگەری کو ب هوربینیەکا گەلەک بلند گرێکێ ڕاکەت بێی کو چ زیان گەهاندن ب شانە و دەمارێن ساخلەم یێن دەوروبەر بگەهیت.
تایبەتمەندیێن ڤێ ڕێیا نوو دبنە ئەگەر کو ترسا نەخۆشان ژ ناڤێ نشتەرگەریێ گەلەک کیم بیت، چونکی چەندین مفایێن سەرەکی بخۆڤە دگریت کو د نشتەرگەریا ڤەکری دا نەبوون. ل سەر پێشەنگیا ڤان مفایان، نەخۆش هەست ب ئێشەکا گەلەک کێمتر دکەت ژبەر بچووکیا جهێ برینان. دیسان، پرۆسەیا چاکبوونێ گەلەک بلەز دکەڤیت و نەخۆش د ماوەیەکێ کورت دا دشێت ڕابیتە سەر پێیان و ڤەگەریتە سەر کار و ژیانا خۆ یا ئاسایی. د لایەکێ دی ڤە، پێدڤیا مانا درێژ د نەخۆشخانێ دا نامینیت، ئەڤە ژی لایەنێ دەروونی یێ نەخۆشی بەهێز دکەت، دگەل کێمبوونا مەترسیێن وەک هەوکرنێ یان ئاریشەیێن پاش نشتەرگەریێ.
دیسان ژ لایێ جوانکاریێ ڤە، جهێ برینان گەلەک یێ بچووکە و چ شۆنوارێن نەجوان ل سەر لەشی بجهـ ناهێلیت.
ل دۆر گونجاندنا ڤێ نشتەرگەریێ بۆ نەخۆشان، د. مصطفی شکری ئاماژێ ب هندێ ددەت کو د پڕانیا حالەتان دا ئەڤ تەکنیکە یا گونجایە، بەلێ بڕیارا دووماهیێ دکەڤیتە سەر پێداچوونا پزیشکی، قۆناغا گەشەکرنا گرێکێ، و بارودۆخێ گشتی یێ ساخلەمیا نەخۆشی.
ئەو دوپات دکەت کو سال بۆ سالێ، دگەل پێشڤەچوونا بەردەوام یا ئامرازان، ڕێژەیا ئەو نەخۆشێن مفای ژ لابرۆسکۆپێ دبینن زێدەتر لێ دهێت.
ل دووماهیێ، دکتۆر مصطفی پەیامەکێ ئاڕاستەی جڤاکی دکەت و دیار دکەت کو پشکنینا پێشوەخت گرنگترین خالە؛ چونکی دەما پەنجەشێرا قۆلۆنێ د قۆناغێن دەستپێکێ دا بهێتە دەستنیشانکرن، چارەسەرکرنا وێ ب ڤێ تەکنیکێ گەلەک سەرکەفتی و ساناهی دبیت. ئەو پشتڕاستیا هندێ ددەت کو تەکنۆلۆجیا پزیشکی یا نوو هاتییە دا کو ئازارێن مرۆڤان کێم بکەت، لەوما پێدڤی ب ترسێ ناکەت.
