نۆڤلێتاره‌ڤین … كۆمه‌كا ره‌ڤینان دناڤ ره‌ڤینه‌كێ دا
خواندنه‌ك بۆ نوڤلێتا ره‌ڤین یا د. ئه‌مجه‌د عوبه‌ید
دلدار محه‌مه‌د
هنده‌ك به‌رهه‌م هه‌ر ژ ناڤ و نیشانی، ملێن نیشانێن پرسیارێ د مشكێ مرۆڤی دا دده‌نه ئێك و هه‌ر ئه‌و پرسیارن مرۆڤی به‌ره‌ڤ جیهانا وی به‌رهه‌می دده‌نه‌رێ، هه‌تا كو خواندنا دوماهیك په‌یڤ ژ دوماهیك نامه ژی رێ ب مرۆڤی ناده‌ن ژێ ده‌ربكه‌ڤی.
نوڤلێتا ره‌ڤین ، یا كو ژ پێنڤیسێ د. ئه‌مجه‌د عوبه‌یدی هاتیه هه‌بوونێ، هه‌ژ ژ ناڤ و نیشانی چاڤ و دل و مێشك به‌ره‌ڤ خوه برن، ئه‌رێ بۆچی ژ هه‌می ناڤان ره‌ڤین؟! ئه‌رێ باس باسێ قه‌ده‌را ملله‌ته‌كێ دیرۆكا وی پر ره‌ڤه؟! یان ژی ره‌ڤینا مرۆڤه‌كی یه به‌ره‌ڤ خوه یان ژی ره‌ڤه‌كا دیتره به‌ره‌ڤ ره‌ڤینێ، ئه‌ڤ هه‌می پرس بوون، من هه‌ست ب ده‌می نه‌كری ده‌مێ به‌ره‌ڤ ره‌ڤینا ئه‌مجه‌د عوبه‌یدی چویم.
پاشان دیاربوو ره‌ڤین كه‌سه‌ك بوو دناڤ له‌پێن ره‌ڤێ دا چاڤێن خوه زلكرین ژ جیهانا زكێ ده‌یكا خوه یا جوانه‌مه‌رگ دایه رێ به‌ره‌ڤ ڤێ جیهانا هه‌موو ژ دایكبویان به‌ره‌ڤ مرنێ د ره‌ڤینیت، له‌و ژ كۆمه‌كا ناڤان كو ئێك ژ وان خه‌مگین ژی بوویه ره‌ڤین بۆ ره‌ڤینی هاتیه هه‌لبژارتن، به‌لێ ژبلی ناڤی نۆڤلێتا ره‌ڤین كۆمه‌كا ره‌ڤینان ب خوه ڤه دگریت:
1 ـ ره‌ڤین ژ بێ دادییا كاربده‌ستان
ره‌ڤین وه‌كی فه‌رمانبه‌ره‌ك، هند ژ بێ دادیی و نه‌دادپه‌روه‌ریا رێڤه‌به‌رێ رێڤه‌ریا خوه ره‌ڤی یه كو رازی بووی و ل سه‌ر خوه قه‌بول كریه بمینیته ل مال، بۆ چه‌ند سالان ب تنێ دا وێ هه‌می نه دادپه‌روه‌ریا هه‌ی بچاڤ نه‌بینیت، ئه‌ڤه وه‌كی كێمترین وه‌فا به‌رامبه‌ر وژدانا خوه پشتی رێڤه‌به‌رێ وی بوویه دوژمن و ئاسته‌نگ د رێیا وی یا سه‌رفه‌راز دا یا كو پر ژ وێره‌كیێ یا كو ئه‌و نێزیكی وه‌زیری كری.
پشتی ژ ترسا چاكسازیێ و لیژنه‌یێن دیڤچوونا پێگیریێ داخواز ژ ره‌ڤینی هاتیه‌كرن ده‌وامێ بكه‌ت، دیسان ژ وێ رێڤه‌به‌ریا جاران دهێته ڤه‌گۆهاستن، ئه‌ڤه‌ژی خویا دكه‌ت كو گرنگه مرۆڤ ڤه‌گوهاستنێ ل سه‌ر خوه قه‌بول بكه‌ت و ل جهه‌كێ دی دگه‌ل هنده‌ك سه‌روچاڤێن دی سه‌ره‌ده‌ریێ بكه‌ت ژ خالا چنه‌یێ ده‌ست پێ بكه‌ت، داكو هه‌ر هه‌بیت و زیندی و دكاری دا خودان هه‌لویست بیت نه‌كو یێ لغافكری بیت به‌لكو زیندی بمینیت و زیندی مانێ ژی گه‌له‌ك ره‌نگێن خویكان دڤی جڤاكی دا دڤێن یان دڤێت بده‌یی یان ژی وه‌كو هه‌ڤالێن نوو یێن ره‌ڤینێ پێدڤییه ل دویڤ لۆژیكێ (نه من دیتیه نه من گوهـ لێ بوویه ) بچین.
2ـ ره‌ڤین ژ زولما دوژمنان
د د هه‌مبێزا نۆڤلێتا ره‌ڤین دا زێده‌باری بیرئینانا كۆچا ملیۆنی ره‌ڤا ب كۆم یا كوردان بۆ سه‌رسنووران ، هاتیه كرن، ره‌ڤینێ لهنگێ سه‌ره‌كی یێ ڤێ نۆڤلێتێ قه‌ده‌را وی ژ دایكبوونه دناڤ روودانێن ئه‌نفالا 1988 دا كو ژانێن ژدایكبوونێ دناڤا شكه‌فته‌كێ ڤه ل دایكا وی بووینه مێڤان و ژدایكبوونا وی ل به‌رامبه‌ر ب دوماهی هاتنا هه‌ناسێن دایكا وی بوو، ئه‌ڤه قه‌ده‌را مله‌ته‌كێ بێ ده‌وله‌ت و نه ئێك رێزه كو تاكێن وی ژ دایكبوونێ هه‌تا فه‌رمانبه‌ریێ هه‌ر د ره‌ڤن لێ نزا به‌ره‌ڤ كێ، ما دێ به‌ره‌ڤ كیڤه ره‌ڤی نه ته دایك بیت نه باب نه ژی وه‌لات، ما دێ به‌رسینگێ شه‌ڤیارێ شێت ڤان هه‌می ڤالاتیێن ره‌ڤینی پر بكه‌ت كو به‌ره‌ڤ دلۆڤانیا وی ب ره‌ڤیت؟!
3 ـ ره‌ڤین ژ سته‌ما جڤاكی
شه‌ڤیارا دوستا ره‌ڤینی یا كو هه‌ردو ژ ره‌ڤینێ بووینه ژ جیهانه‌كا زۆردار به‌ره‌ڤ ئێك دووڤه هاتینه و بووینه په‌ناگه‌هـ بۆ هه‌ڤدو پاشی بوینه جێمكێن روحا هه‌ڤدو، ژ سته‌ما جڤاك و دایك و بابێن خوه ته‌نگه‌زاری دونیایێ دبیت پشتی وان ب زۆری ئه‌و دایه شویی و نه ب حه‌ز و دلخوازییا وێ ئه‌ڤه‌بوو ئه‌و به‌ره‌ڤ موسل و به‌غدا و پاشی ژی به‌ره‌ڤ تونێلێن تاریێ یێن ب تنێمانێ و پاشی ژی به‌ره‌ڤ له‌شفرۆشیێ بۆ ژیانكرنێ ب ره‌نگه‌كێ به‌رده‌وام ! ئانكو ره‌ڤین به‌ره‌ڤ له‌شفرۆشیێ هه‌لبژارت نه‌كو نالینا به‌رده‌وام ژ ده‌ردێ زۆریا جڤاكی.
ره‌ڤین نوڤلێته‌كا 84 به‌رپه‌ری یه ، دبێژیت هه‌ر ره‌ڤینه‌كێ به‌ره‌ڤ یێ دی ڤه ب ره‌ڤیت دێ قه‌ده‌را وی باراندنا سیلاڤێن رۆندكان بیت ل سه‌ر گۆڕێن دوستێن خوه یێن هه‌می هیڤی دگه‌ل هه‌بوونا خوه برین، له‌وما چه‌ند ژ خوه ب ره‌ڤین ژی چاره ئه‌و ڤه‌گه‌رینه نك خوه دا وه‌كی شه‌ڤیارێ و ره‌ڤینی ب تنێ مانا ل به‌غدایێ و ب تنێ مانا ل ژیانێ مه خه‌مگین و ئالۆز و به‌رزه نه‌كه‌ت.
