نیان ئهحمهد: ماددەیێن هۆشبهر ههموو تهخێن جڤاكی ڤهگرتینه
هەولێر، قائید میرۆ:
ئهندامەکا لیژنا بلندا هشیارکرنا مهترسیێن ماددێن هۆشبهر دیار کر کو ماددێن هۆشبهر مهترسیهكا مهزن پهیداكریه ل ئهڤان سالێن دووماهیێ و ههموو تهخێن جڤاكی ڤهگرتینە گۆت؛ قانوونێ سزایێن گران بۆ بازرگانێن ماددێن هۆشبهر داناینە.
لدۆر مهترسیێن ماددێن هۆشبهر، نیان ئهحمهد، ئهنداما لیژنا بلندا هشیارکرنا مهترسیێن ماددێن هۆشبهر د دیدارەکێ دا بۆ رۆژنامەیا ئهڤرۆ دیار كر، مادهیێن هۆشبهر بووینه مهترسیهكا مهزن لسهر ههرێما كوردستانێ، مخابن سال بۆ سالێ مهترسیێن ماددێن هۆشبهر د زێدهبوونێ دانه، چونكه ئالۆدهبوون ب ماددێن هۆشبهر زێدهبوویه و حوكمهتا ههرێمێ ژی بهرهنگاری ئهڤێ مهترسیێ بوویه و چوویه رێزا ئهڤان وهلاتێن ههوا بهرهنگاربوونا ماددێن هۆشبهر ئهنجام ددهت و گۆت؛ چهندین وهزارهت و دهزگههێن حوكمهتێ و دهرڤهی حوكمهتێ ژی تێدا د پشكدارن.
نیانێ دا زانین، سهرۆكایهتیا جڤاتا وهزیرێن ههرێما كوردستانێ دو لیژنهیێن بلند پێكئیناینه ئهوژی لیژنا بلندا بهرهنگاربوونا ماددێن هۆشبهر و لیژنهیا بلندا هشیاركرنا وهلاتیان ژ مهترسیێن ماددێن هۆشبهر و گۆت؛ سالا بۆری مه وهكی لیژنهیا هشیاركرنێ و وهزارهتا رهوشنبیری ههوهكا مهزن یا هشیاركرنێ ئهنجامدا، ئهڤ ساله ژی ب ههمان شێوه ههوهكا هشیاركرنێ بڕێڤه چوو تێدا، چهندین چالاكی هاتنه ئهنجامدان ب مهرهما هشیاركرنا وهلاتیان لدۆر مهترسیێن ماددێن هۆشبهر.
ئهنداما لیژنا بلندا هشیارکرنا مهترسیێن ماددێن هۆشبهر دیار کر کو هژمارا وان كهسێن ب تاوانا ماددێن هۆشبهر هاتینه حوكم کرن گەلەک زۆرن و سال بۆ سالێ ژی زێدهتر دبن، ئهڤه مهترسیهكا مەزنە لسهر ههرێما كوردستانێ و وهلاتیان، بهلێ دگهل زێدهبوونا ئهڤان مهترسیان بزاڤێن زۆر ههنه بۆ كێمكرنا مهترسیێن مادێن هۆشبهر.
نیانێ زێدەتر گۆت؛ ئێك ژ مهترسیێن ماددێن هۆشبهر ئهوه ههموو تهمهنهك تێدایه، ڕێژەیا ژنان زۆرە، سنێلهنە كهسێن خودان باوهرنامه ههتا كهسایهتیێن دیار و رهوشنبیر ئهڤه مهترسیه ب راستی، ژبهركو ههموو تهخێن جڤاكی ڤهگرتیه.
نیان ئەحمەد د بەردەوامیا ئاخفتنێن خۆدا دیار کر دهزگههێ خێرخوازی یێ بارزانی سهنتهرهكێ چارهسهركرنێ ڤهكریه بۆ چارهسهركرنا وان كهسێن ئالۆدهبووی و گۆت؛ ئەو كهسێن بازرگانیێ ب ماددێن هۆشبهر دكهن سزایهكێ گران بۆ هاتیه دیاركرن ل گورهی قانوونێ، هەروەسا ئەو كهسێن ئالۆدهبووی وهكی نهخۆش سهرهدهری دگهلدا دهێتهكرن و حوكمهت چارهسهر دكهت.
