هه‌كه‌ر ب من بایه به‌هشتا خوه هه‌لبژێرم
هه‌لبه‌ست: ماجد الحیدر
وه‌رگێران: عصمت محمد بدل
هه‌كه‌ر ب من بایه به‌هشتا خوه هه‌لبژێرم
دا ل گوندێن ژبیركری ئاڤا كم
دوور ژ هه‌موو رێیان
دا كمه گونده‌ك كه‌زاختی
ب تنێ چه‌ند مالێن بچووك
مالێن پاكێن بچووك بۆ هه‌ڤالێن خوه
و ماله‌ك بچووك بۆ من..
ب ژۆره‌كا لێكداییا مێهڤانان و باخچه‌یه‌كێ بێ په‌رژان
ل گه‌ل هه‌ڤژینا خوه لێ ژیم..
هه‌ڤژینا من یا سه‌ر ئه‌ردی، نه چو یێن دی..
ئو كتێبخانه‌یه‌كا مه‌زن
دا كتێبێن وێ ب دلێ خوه خوونم( ما ل پێشییا من نه هه‌موو ئه‌به‌دییه‌ته؟)
ئه‌رێ..
و سه‌یه‌ك بچووك یان جۆته‌ك سه‌یان..
جۆته‌ك كووسه‌له‌یێن ژیرێن ب ئه‌زمان
سپێده‌یێ دا ل باخچه‌یی كار كم
و ل مه‌تبه‌خێ هاری هه‌ڤژینا خوه كم
د ناڤبه‌را خوله‌كه‌ك و یا دی دا، دا رامووسم
ئێڤاری، دا ل گه‌ل هه‌ڤالێن خوه روونم
مه‌یا سۆز پێ هاتییه دان ڤه‌خوه‌ن
زێده جگاره‌یان كێشن( ل ڤێ ده‌رێ ترس ژ تووتنێ نینه!)
تێر ئاخڤن
دا ب ساده‌هییا خوه‌یا كه‌ڤن و
سڤكییا خه‌ونێن خوه كه‌نن
گه‌له‌ك.. گه‌له‌ك گوهدارییا مۆزیكێ كن
هه‌كه‌ر ب من بایه هه‌لبژێرم!
