هەر پێنج هەست
بەهزاد بەهرام
بشكۆژ و خۆنچەیا
باخچە و سەبرا دلێ من
گولچیچەكا
هەر چل بهارێن جانێ من
د ئەزەل دا چەندێ بێ هەست بووم
تو بووی بنواشە و
ئەگەرێ ئازرینەر و ئازراندنا
هەر پێنج هەستێن من
تە ب چاڤێن خوە یێن باهیڤی
چاڤێن من ژ شێلیبوونێ ڤەوژارتن
هەستێ دیتن و چاڤلێدانێ
تە ل من زوو ئازراند
تە ب مێكاب و گولاڤا خوە
فێركرمە پرۆسەیا
هەلمژین و بهێنكرنێ
هەستێ بهێنكرن و ئوكسجینێ
مینا بابەلیسكێ ل دۆر من
زڤڕی و زڤڕی
تە ب ئاواز و ڕیتما دەنگێ خوە
پەردەیێن گوهێن من
ژ وشوشبوونێ ڤەكرن
دەنگێ تە هەردەم ڤەددەت
هەستێ بهیستن و گوهلێبوونێ
ئەز ڤەجنقاندم
تە ب جۆت قوبەهێن ڕاست و چەپ
هەردو دەستێن من
چەپ و ڕاست، ڕاكێشانە سەر
هەستێ دەستلێدانێ
ژ بنێ پێیان تا سەرێ سەری
مینا هێزا كارەبێ لەرزاندم
ژ لێڤێن تە
لێڤا سەری تا لیڤا بنی
دلۆپ دلۆپێن خۆشابێ
ژێ دباری
من قەد نەزانی چەوان ژێ ڤەخۆم
تە ب پرۆڤە و پرۆسە
هەستێ تامكرن و مێژانێ
ئەز كەهی
وی لەشی هەمییێ كرم
ئێدی هەر ڕۆژ، من ب هەمی ڤە
تو دئالیستی
هێشتا دبێژی من، ئەزا بێ هەستم..!
