هەستكرن ب بەرپرساتیا نیشتیمانی هەمی ئالۆزیێن سیاسی دێ هێنە چارەسەركرن
عەبدولرەحمان مەحموود
قووناغەكا هەستیار و چارەنڤیسساز، ئەڤرۆ هەرێما كوردستانێ تێدا دەرباز دبیت، ب تایبەت پشتی گیرۆبوونا پێكنەئینانا كابینەیا دەهێ، كو جادەیا كوردی ب گشتی و چاڤدێرێن سیاسی ب تایبەتی، چاڤەڕێی دەستپێشخەریەكێ یان دەنگەكێ ئازا و بوێرن، كو بشێت ڤێ گرێكا سیاسی یا نوكە ڤەكەن، دبینین ڤان ناكۆكیێن سیاسی یێن ڤێ دوماهیێ كاریگەریەكا ڕاستەوخۆ ل ناڤ و پێگەهێ هەرێما كوردستانێ كریە، هەلبەت بۆ چارەكرنا ڤان ئالۆزیان ژی ئەوە،ك لیل د دەستێ پارت و لایەنێن سیاسی یێن هەرێمێ، بتایبەتی پارتی و ئێكەتیێ دایە، وەك دوو جەمسەرێن سەرەكی یێن دەستهەلاتێ ل كوردستانێ، د قووناغێن جودا یێن دیرۆكێ دا، نیشادایە كو سەرەڕای دژوارترین هەڤڕكیان، ل دوماهییێ گەهشتینە ڕێكەفتنێ، كە واتە چارەكرنا ڤان ئالۆزیێن نوكە ژی، دشێت فاكتەرەكێ ناڤخۆیی بیت، ئەوژی ب ڕێیا سازشكرنێن دولایەنی، وەك قەبوولكرنا پشكەك ژ داخوازیێن لایەنێ بەرانبەر، بۆ دەركەفتن ژ ڤێ قووناغا هەستیار، بێگومان بۆ نەهێلانا ڤان ئالۆزیان ژی، بارا پتر چارەكرن دكەڤیتە سەر ملێن پارتی، ژ پێگەهێ خۆ یێ جەماوەری و ژ وێ خزمەت و خەباتا خۆ یا چەندەها سالان، پتر هەست بەرپڕسایەتیا خۆ یا نیشتیمانی دكەت، لەوما بۆ ڤێ مەرەمێ ژی گەلەك پێنگاڤ هاڤێتینە و داگێڕان ژ مافێن خۆ كریە، بۆ لایەنێن بەرانبەر، نەخاسمە ئێكەتیێ ژ پێخەمەت ڕازیكرنا وان و گەهشتن ب چارەسەریەكا ڕەها و پێكڤە كاركرن بۆ پێكئینانا كابینەیا دەهێ و كاراكرنا پەڕلەمانێ كوردستانێ، هەر چەندە ژ ئەنجامێ ڤێ ئالۆزیا سیاسی تاكێ كورد نوكە پتر ژ هەر دەمەكێ دی یێ هۆشیارترە و زەرەرمەندێ ئێكەم یێ ڤێ شەلەلا سیاسی یە، لەوما فشارا مەدەنی دبیتە ئەگەرەكێ دی یێ ڤەبوونا ڤێ گرێكا سیاسی، كە واتە فشارا مەدەنی و ڕایا گشتی دشێن هێزێن سیاسی نەچار بكەن ل سەر مێزا گفتوگۆیێ بڕوینن، هەر دیسا جادە دشێت ب ڕێیا سندۆقێن دەنگدانێ، یان نەڕازیبوونێن مەدەنی ببیتە سەپێنەرێ چارەسەریێ، ئەگەر ئەڤ فاكتەرە نەشیان ببنە هوكارێ چارەسەریا ڤان ئالۆزیان، فاكتەرێ دەرڤە بهێز دكەڤیتە د ناڤ هەڤكێشێ دا، ئەو ژی جڤاكا نیڤدەولەتی ب تایبەت ئەمریكا و ئەورۆپا كو بەردەوام هۆشداریێ ددەنە لایەنێن كوردی كو پەرتەوازەی دێ پێگەهێ هەرێمێ لاواز كەت و پێدڤییە ئالۆزیێن سیاسی ب دیالۆگێ بهێنە چارەسەركرن، ئەڤجار یا هەری گرنگ بۆ چارەكرنا ڤان ئالۆزیان، دڤێت هەستكرن ب بەرپرسیارەتییا نەتەوەیی و نیشتمانی بیت ژ لایێ سەركردایەتییا سیاسی یا كوردستانێ ڤە، ڕاستە فاكتەرێن دەرەكی و فشارێن جاددێ دشێن ببنە پالدەر، بەلێ بڕیارا دوماهییێ د دەستێ لایەنێن ناڤخۆیی دا یە، ئەڤجار دیرۆكێ سەلماندیە كو چەند گرێ دژوار بن، ل دوماهییێ دڤێت ب دیالۆكێ بهێنە ڤەكرن، بەری كو زیانێن مەزنتر بگەهنە ئەزموونا هەرێما كوردستانێ، لێ د وێ باوەرێ دا مە ب حكیمەتا لێزان و سەركردەیێن دلسۆزێن ڤی ملەتی، ئەڤ ئالۆزی و گرێكێن سیاسی وەك خۆ نامینن و دێ هەر گەهنە چارەسەریەكێ، كو جارەك دی پەڕلەمان كاڕا ببیت و كابینەیا دەهێ بكەڤیتە د خزمەتا هەڤوەلاتیان دا.
