هەلسەنگاندنا ب کارئینانا دەرمانێ “کیتۆتیفین” Ketotofine یێ زارۆکان
پ.د. هشام یوسف بایزید
د ڤان وەرزێن سار و بەلاڤبوونا ڤایرۆسێن کۆئەندامێ هەناسێ دا، رێژەیا زارۆکێن تووشی تەنگەنەفەسیێ و نەخۆشییا رەبوویا دژوار دبن گەلەک زێدە دبیت. وەک بەرسینگگرتن، گەلەک نۆشدار دەرمانێ (کیتۆتیفین) ب رەنگەکێ گشتی و زێدە بۆ زارۆکان دنڤیسن. لێ بکارئینانا ڤی دەرمانی ب رێژەیەکا هۆسا مەزن بۆ چارەسەرکرنا تەنگەنەفەسیێ جهێ گۆمانێ یە. بەلگەیێن زانستی دیار دکەن کو مفایێ کیتۆتیفینی بۆ نیشانێن رەبوویێ ب تنێ یێ پشتراست نینە و ل سەر دهێتە گۆتۆبێژکرن. رۆلێ ڤی دەرمانی پتر یێ سەلماندی یە بۆ چارەسەرکرنا هەستیارییا پیستی (ئەتۆپیک دێرماتایتس) یان ئەو تەنگەنەفەسییا دگەل هەستیارییا دفنێ دا هەبیت.
بۆ زارۆکێن تووشی رەبوویێ یان تەنگەنەفەسییا ڤایرۆسی بووین، رێنمایێن نوشداری یێن سەردەم دیار دکەن کو دەرمانێن پتر کاریگەر وەک (بخاخێن کۆرتیزۆن) بهێنە بکارئینان. نڤیسینا کیتۆتیفینی ب بێی جوداهی دبیتە ئەگەرێ خەرجیێن زێدە یێن دەرمانی و گیرۆبوونا چارەسەرییا دروست. هەروەسا، بارەکێ دارایی یێ گران دکەڤیتە سەر ملێ دایک و بابان ب بێی کو مفایەکێ مسۆگەر هەبیت.
دڤێت لژنەیێن ساخلەمیێ ل ڤێ چەندێ بزڤڕن دا کو نڤیسینا دەرمانی ل دویف بنەمایێن زانستی بیت. سنوردارکرنا کیتۆتیفینی ب تنێ بۆ وان حالەتێن هەستیارییا گشتی تێدا هەبیت دێ بیتە ئەگەرێ باشتربوونا بارێ تەندروستی یێ زارۆکان و کێمکرنا خەرجیێن بێ مفا. ب کورتی، نڤیسینا هوور یا دەرمانی یا فەرە بۆ پاراستنا ساخلەمییا زارۆکان.
