وه‌فایه‌ك بۆ بابێ من
سولین حه‌سه‌ن
ئێكه‌م حه‌ژێكرنا من بۆ ژیانێ ژ بابێ من ده‌ستپێدكر، هه‌ر چه‌نده ده‌یكا من جهه‌كێ تایبه‌ت ل ده‌ف من هه‌یه و هندی بۆ بێژم و بنڤیسم كێمه. راستی بیت ئه‌ڤ نڤیسینا من یان خوه مژویلكرنا من ب ڤێ نڤیسینێ مه‌به‌ست پێ ئه‌و نینه كو ئه‌ز بهێم و په‌سنا ده‌یك و بابێن خوه بۆ هه‌وه بكه‌م، لێ ژبه‌ركو ئه‌و ده‌ستپێكا منن كو ئه‌ز به‌ره‌ڤ ژیانێ بهێم، خراب نینه ئه‌ز وان بكه‌مه ده‌ستپێكه‌ك بۆ هاتنا من بۆ ناڤ جیهانا نڤیسینێ بخوه ژی.
نڤیسین بخوه تامه‌كا دییه و جاره‌كێ من هوسا خاندبوو دگۆت، نڤیسین یان كو ژیان، یان كو حه‌زژێكرن، ئه‌رێ راستی بیت ئه‌گه‌ر ڤێ پرسیارێ بكه‌م، دێ نڤیسین ژیانێ و حه‌زژێكرنێ ده‌ته من، ئها ئه‌ز هه‌ر چه‌ند په‌رتووكه‌كێ بكرم یان رۆژنامه‌كێ ژ بازاری بینمه مال، ئه‌ز ل به‌رسڤا ڤان پرسیاران دگه‌رم، ئه‌ز ل ژیانێ و حه‌ژێكرنێ دگه‌رم، بوویه ئه‌ز دێ نڤیسینا خوه هێلمه ڤه‌كری و وه‌ك چاوان بایه‌كێ نه‌رم خوه ل ناڤا به‌لگێن سپیندارا دده‌ت و گڤێنێ دئێخیتێ، وه‌ك چاوان تێشكا سڤیانه‌كێ ل بن سیڤانده‌كێ بزاڤێن فرینێ دكه‌ت، ئها من دڤیا ڤێ بێژم، دگه‌ل نڤیسینێن خوه فێری ژیانێ ببم و فێری حه‌ژێكرنێ ببم و به‌ری ئه‌ز دژیانێ بگه‌هم ژی، من دڤێت ژیان ب هه‌می سه‌ربۆر و خوه‌شی و نه‌خوه‌شیێن خوه دمن ب گه‌هیت و من فێری فراكێ بكه‌ت.
