پرۆسێسا بەلاڤكرنا پارچەیێن ئەردی دێ یا بەردەوام بیت
هەولێر، قائید میرۆ:
بەرپرسەكێ وەزارەتا باژێڕڤانی و گەشتوگوزارێ ئاشكرا كر، لیستەكا دی یا ناڤێن پێشمەرگەی و هێزێن ئەمنی بۆ سەرۆكاتیا جڤاتا وەزیران هاتیە هنارتنن بۆ وەرگرتنا پارچەیێن ئەردی و دبێژیت، لیستا ناڤێن فەرمانبەرێن گریبەست ژی هاتیە بەرهەڤكرن.
سەربەست مەولود، سەرۆكێ تیما هووربینیێ ل فۆرمێن ئەردی بۆ رۆژناما ئەڤرۆ دیاركر، لستەكا دی یا یا ناڤێن پێشمەرگەی و ئەندامێن هێزێن ناڤخۆ ژ لایێ وەزارەتا باژێڕڤانیێ ڤە بۆ سەرۆكاتیا جڤاتا وەزیران هاتیە بلندكرن، ب مەرەما وەرگرتنا رازیبوونێ بۆ بەلاڤكرنا پارچەیێن ئەردی و گۆت: «ناڤێ دو هزار و 500 كەسان د وێ لیستێ دایە، پشتی ژ لایێ جڤاتا وەزیران ڤە دهێتە پەسەندكرن، ناڤێن وان بۆ باژێڕڤانیێن وان ب مەرەما مفاداربوون ژ وەرگرتنا پارچەیێن ئەردی دێ هێنە هنارتن، وەزارەتا باژێڕڤانیێ ئامارێن فەرمابنەرێن گرێبەست ژی بەرهەڤ كرینە و بڕیارە ئەو ژی بۆ سەرۆكاتیا جڤاتا وەزیران بهێنە هنارتن».
سەربەست مەولود گۆت ژی: «بڕیارا سەرۆكاتیا جڤاتا وەزیران بۆ فەرمانبەرێن گرێبەست هەیە، پشتی پەسەندكرنا ناڤێن وان ب هەمان مەرج و رێنومایێن فەرمانبەرێن هەمیشەیی دێ ئەو ژی ژ وەرگرتنا پارچەیێن ئەردی مفاداربن، ل هەموو رێڤەبەریێن باژێڕڤانیان بەلاڤكرنا پارچەیێن ئەردی یا بەردەوامە و هەتا نوكە هژمارەكا زۆرا فەرمانبەران ژێ مفاداربووینە، پرۆسێسا بەلاڤكرنا پارچەیێن ئەردی ژی دێ یا بەردەوامبیت، هەتا هەموو فەرمانبەر پارچەیێن ئەردی وەردگرن».
