پیرۆزبت ئه‌ڤ سالا بێتن
له‌زگین گراڤی
سال ب سال ..
ئه‌م چاڤه‌ڕێینه
ل هیڤیا نوو سال بێتن
نوو ساله‌ك پڕ..
خێر و بێر بێت
كانیا واری بزێتن.
كانی هه‌ر هشك و زوهایه
ئومێد و خوه‌زی هه‌نه
سال ب سال..
دیل و بن ده‌ستین
ئاوات و هیڤی دمرن.
به‌نده‌ر و ده‌ریا..
ژ دل بوون
مه‌شخه‌لا نیڕۆژو سالان
بۆ گه‌نج مشه‌خت بوون..
ژ واری. .؟
خوه ل هیڤیان ناگرن!
په‌یاما مه‌م و ژ بۆ زینێ
باهرا به‌فرێ فڕاند
سۆزدار و دینێ سه‌لوایێ..
په‌یاما خوه ژ دل ..
وه‌شاند.
سال ب سال
بێ داو و دادوكین
به‌لاڤن ده‌رد و په‌ژی
كوشتن و گرتن به‌لاڤ بوو
وار كرن خوه‌لی و..
ڕه‌ژی.
نالینه و گوهدار مه نینن
هه‌ر دبێژین ڕابه زوی
ئه‌ڤ چه‌مێ هشك و زوها مای
ڕه‌زڤان ئاڤ نادن ڕه‌زی
هرچ و گورك به‌ربوون به‌رانان
به‌رخ و كاڤر به‌زاندن
بێ سۆزان ئاوات فرۆتن
پێنوسێ خوه نڤاندن.!
سیسته‌مێ پرتووك و وانان
ژ شاشیان په‌سه‌ند كری!
ڕه‌هوان ژی دیل و بن ده‌سته
پیت و په‌یڤ یێ ژبیر كرین
سال بۆرین هێشتا یێ بڕێڤه
هه‌تا كه‌نگی دێ به‌زین؟!
مه برین هو ته‌نا نابن ..
ب فیغان و ب گرین.
سال ب سال
دوما درێژه، دل كولێ..
پار و پێرار
نوو سالان هه‌ر مه ئومێده
نه‌مینن دیل و هه‌ژار
دخوازین نوو سال پیرۆزبت
ڕزگاربت ملله‌ت و وار
پیرۆزبت ئه‌ڤ سالا بێتن
ئاڤا ببت نیشتمان
هه‌ربژی و هه‌رده‌م بلندبی
ئالا كورد و كوردستان.
