ژ بەر فشارێن ناڤخوەیی رێککەفتنا ئیرانێ ل گەل ئەمریکا گەلەک زەحمەتە
چاڤدێرێن سیاسی دیار دکەن، گەلەک کەسێن توندرەو و کاریگەر ل ئیرانێ ناهێلن سەرکردەیێن وی وەلاتی ل گەل ئەمریکا رێککەڤن و د رەوشا نها دا داخوازیێن ئەمریکا و ئیرانێ گەلەک ژێک دوورن و گەلەک زەحمەتە هەر دو وەلات رێککەڤن.
مەنسور عەزیزی چاڤدێرێ سیاسی یێ خەلکێ رۆژهەلاتێ کوردستانێ دیار کر، ئەمریکا گەلەک بزاڤان دکەت دا ئیران یۆرانیۆما پیاندنی رادەست بکەت و ل هەمبەر دا ئیران تشتەک وەسا قەبوول ناکەت و ل ئالیێ دی مە دیت کا چاوا ئیران رژد بوو دڤێت شەر ل لوبنانێ ژی بهێتە راگرتن، لێ دیسان ژی ئیران گەلەک ژ داخوازیێن ئەمریکا رەت کرن و د رەوشا نها یا گەلەک ئالۆز دا رێککەفتنا ئیرانێ و ئەمریکا گەلەک یا زەحمەتە، هەرچەندە بەرپرسێن پاکستانێ دبێژن ئیران و ئەمریکا نێزیکی رێککەفتنێ بووینە، لی راستیێن ل مەیدانێ نیشا ددەن کو تشتەک وەسا نینە.
ناڤهاتی ئەو یەک ژی دیار کر، د ناڤ ئیرانێ دا ب تایبەتی ژی د ناڤ دەولەتێ دا گەلەک کەسێن توندرەو هەنە و رێ نادەن رێککەفتن بهێتە کرن، سوپایێ پاسداران بەرهەڤ نینە چو داخوازیێن ئەمریکا قەبوول بکەت و بەرپرسێن دی یێن ئیرانێ ژی باش دزانن هەتا رێککەفتن نەهێتە کرن دێ رەوش یا ئالۆز بیت و هەروەسا هەکە دۆرپێچا دەریایی یا ل سەر ئیرانێ بەردەوام بیت دێ کارەساتێن مەزن ل ئیرانێ روو دەن.
سەبارەت ب ئێرشێن ل سەر کوردان ژی ناڤهاتی دیار کر، مخابن نها ئاگربەست د ناڤبەرا ئالیێن شەڕی دا هەیە و کورد پشکەک ژ شەڕی نەبوون، لێ دیسان ژی ئیران ئێرشی هەرێما کوردستانێ دکەت و ٥ پێشمەرگێن رۆژهەلاتێ کوردستانێ شەهید کەفتینە، ئەو یەک تاوانەک مەزن و مخابن جڤاکێ نێڤدەولەتی ژی ل هەمبەر زێدەگاڤیێن ئیرانێ یا بێدەنگە.
هادی عەزیزی چاڤدێرێ سیاسی ل لەندەنێ ژی دیار کر، ل ئالیەکێ ئاگربەست د ناڤبەرا ئیرانێ و ئەمریکا دا هەیە و ل ئالیێ دی ترسەکا مەزن ژی ل ئیرانێ هەیە کو دبیت جارەکا دی خەلک ل دژی دەستهەلاتێ دەست ب خوەنیشادانان بکەن، ژ بەر ڤێ یەکێ ژی رۆژانە ب هزاران چەکدارێن ئیرانێ و ئالیگرێن وان یێ د ناڤ کۆلانان دا خوەنیشادانان دکەن و خەلکی چاڤترسی دکەن، ل ئالیێ دی زانیاریێن ل بەردەست نیشا دەن کو رۆژانە چالاکڤانێن سیاسی و مەدەنی ل ئیرانێ دهێنە دەستەسەرکرن، هەر پشتی راگرتنا شەڕی هەتا نها زێدەتر ژ سەد کەس ل ئالیێ ئیرانێ ڤە ب تومەتا سیخوریێ بۆ ئەمریکا و ئسرائیلێ هاتینە سزادان.
ناڤهاتی ئەو یەک ژی دیار کر، فشارەک گەلەک مەزن ل سەر خەلکێ کورد ل رۆژهەلاتێ کوردستانێ هەیە و ل ئالیێ دی ئێرشێن ئیرانێ ل سەر کەمپێن مەدەنی یێن پەنابەرێن رۆژهەلات ژی بەردەوامن و ئەو یەک ژی نیشا ددەت کو دەستهەلاتا نها یا ئیرانێ نەڤێت پرسا کوردی و پرسێن دی چارەسەر بکەت، هەتا رەوش وەسا بەردەوام بیت دێ ئالۆزیێن ل ئیرانێ ژی بەردەوام بن و هندەک هێز ل ئیرانێ هەنە کو ل سەر ئالۆزیان و شەڕی دژین و وان نەڤێت رێککەفتن ل گەل ئەمریکا ژی بهێتە کرن و گۆت: (رێککەفتنا ئەمریکا و ئیرانێ د رەوشا نها دا گەلەک زەحمەتە و ئەمریکا ژی ب هەموو رەنگەکێ ئیرانێ تەنگاڤ دکەت و ئیران ژی بەرهەڤ نینە داخوازیێن ئەمریکا قەبوول بکەت، ژ بەر ڤێ یەکێ ژی گەلەک زەحمەتە ئیران و ئەمریکا رێککەفتنێ بکەن و دبیت جارەکا دی شەڕ ب دژواری دەستپێ بکەت).
هژمارەک زێدە ژ چالاکڤان و چاڤدێرێن سیاسی یێن ئیرانی ژی وەسا دبینن کو هژمارەک زێدە ژ بەرپرسێن ئیرانێ ناخوازن رێککەفتن ل گەل ئەمریکا بهێتە کرن، چونکی هەکە رێککەفتن بهێتە کرن دێ ئیران تووشی قەیرانەکا مەزن یا ئابووری بیت و وی دەمی دێ خەلک ل دژی دەستهەلاتێ دەست ب خوەنیشادانان کەن و دێ مەترسی ل سەر دەستهەلاتێ دروست بیت، چونکی رەوشا نها یا ئیرانێ رەوشا شەڕی یە و هەتا رەوش وەسا بیت بەرپرسێن ئیرانێ وەکو رەوشەکا نەئاسایی سەرەدەریێ دکەن.
ئەو یەک د دەمەکێ دایە کو دوهی سەرۆکێ ئەمریکا دیار کر، هەکە رێککەفتن ل گەل ئیرانێ نەهێتە کرن دێ دیسان دەست ب لێدانا ئیرانێ کەن و دێ هەموو ژێرخانێن ئابووری و وزێ یێن ئیرانێ ژناڤ بەن.
ل ئالیێ دی دوهی ئیسماعیل بەقایی پەیڤدارێ وەزارەتا دەرڤە یا ئیرانێ ژی دیار کر، دۆنالد ترامپێ سەرۆکێ ئەمریکا هەر گاڤێ تشتەکێ دبێژیت و ئێدی باوەریا کەسێ ب ترامپی و سیاسەتا وی نەمایە و گۆت: (وەکو ئیران ئەم یۆرانیۆما پیاندی رادەستی چو وەلاتەکێ ناکەین، ئەو یەک بۆ مە هێلا سۆرە و ژ بەر سەرەدەریا شاش یا ئەمریکا ئەم نەچار ماین مە جارەکا دی دەرتەنگا هۆرمز دائێخست و هەتا سیاسەتا ئەمریکا یا سزادانا ئیرانێ بەردەوام بیت دێ دەرتەنگا هۆرمزێ ژی دائێخستی بیت و ئەم سیاسەتا ترامپی سەبارەت ب رێککەفتنێ ژی ب توندی رەت دکەین).
