ڤایرۆسێن ب رێیا خوینێ دهێنە ڤەگوهاستن
بەرپەرێ ساخلەمیێ:
د.زەکی عەلی بەرواری”، تایبەتمەندێ نەخۆشیێن دل و هناڤا و پەنجەشێرا خوینێ دیارکر کو گەلەک ڤایرۆس هەنە ب رێکا خوینێ دهێنە ڤەگۆهاستن، بەلێ یێن ژ هەمیان بەربەلاڤتر نێزیکی ٤ یان ٥ ڤایرۆسانە ئەوژی، ڤایرۆسێ جەگەرێ ژ جورێن B&C وڤایرۆسێ (HTLV) کو دبیتە ئەگەرێ هندەک جورێن پەنجەشێرا خوینێ (لوکیمیا و لیمفۆما) و ڤایرۆسێ Cytomegalovirus و ڤایرۆسێ Epstein-Barr
دکتۆر زەکی دیارکر گەلەک رێک هەنە بۆ ڤەگۆهاستنا وان بەلێ یێن ژ هەمیێ گرنگتر ئەڤەنە، ب کارئینانا دەرزیێن پیسبووی ژ لایێ وان کەسێن ماددەیێن بێهۆشکەر (مخدرات) بکار دئینن، یان ڤەگوهاستن ژ دایکێ بۆ زارۆکی ل دەمێ ژدایکبوونێ و ب رێکانشتەرگەری یان کارێن ددانا و دیسا هەکە ئامیر ب باشی نەهێنە تەعقیم کرن و دیساڤەگوهاستنا خوینێ ژ کەسەکێ بۆ کەسەکێ دی و دەردەدانێن لەشێ مرۆڤی ب گشتی و دیسا پەیوەندیێن سێکسی یێن نە شەرعی و گۆت: نوکە رێکارێن تەعقیمێ گەلەک باشتر لێ هاتینە و مەترسی ل نەخۆشخانەیان کێمتر بوویە، بەلێ هێشتا مەترسی ل دەڤ ب کارئینەرێن ماددەیێن بێهۆشکەر گەلەک یا بلندە.
ل دۆر رێکارێن خۆپاراستنێ دکتۆر زەکی دیارکر کو چەند خالێن گرنگ هەنە وەکو، بەری هەر نشتەرگەریەکێ، دێ پشکنین بۆ نەخۆشی هێتە کرن دا بزانین کا ئەڤ ڤایرۆسە ل دەڤ هەنە یان نە، دیسا ب کارئینانا کەلوپەلێن پاراستنا کەسی (PPE) وەک، دەزگورک، کەمامە، جلین تایبەت (ئەپرۆن) و بەرچانکێن خۆپاراستنێ (بۆ نۆشدارێن ددانا)، هەکا نوشدار یان کارمەند تووشی برینەکێ بوو ب ئامیرەکێ پیس، دێ ئێکسەر دەست ب وەرگرتنا دەرمانێن پێدڤی کەن.
