گرۆپەکێ نوی یێ خوینێ هاتە دیتن
پشتی 50 سالان ژ نەدیاریێ، زانا شیان کۆمەلەکا دەگمەن یا خوینێ ئاشکەرا بکەن و ناڤێ وێ سیستەمێ “MAL” دانایە.
ل دویڤ نووچەیەکێ مالپەرێ “scitechdaily”، ئەڤ دیتنە پشتی وێ چەندێ هات دەمێ ڤەکۆلەران ب ڕێیا شیکارکرنەکا هوور یا جینی بۆ دیار بووی کو پرۆتینەکێ بچووک ل سەر خڕۆکێن سۆر یێن خوینێ بەرپرسە ژ چێبوونا دژەتەنێ “AnWj”، ئەوا ژ سالا 1972 وەرە تشتەکێ ڤەشارتیبوو بۆ نۆشداران.
پتریا مروڤان ئەڤ پرۆتینە یێ ل دەڤ هەین، بەلێ ئەو کەسێن ب دەگمەن و ب شێوەیەکێ بۆماوەیی ئەڤ پرۆتینە ل دەڤ وان نینە، ل دەمێ وەرگرتنا خوینا ئاسایی تووشی مەترسیەکا مەزن دبن؛ چونکی لەشێ وان وەک ماددەکێ بیانی هێرشێ دکەتە سەر خوینا نوی.
ئەڤ دەستکەفتێ نۆشداری، کو وەک 47تەمین سیستەمێ فەرمی یێ کۆمەلا خوینێ هاتیە نیاسین، ڕێکێ خۆش دکەت بۆ چێکرنا پشکنینێن جینی یێن نوی دا کو ئەو کەسێن دەگمەن بهێنە نیاسین بەری خوین بۆ بهێتە دانان.
ئەڤ چەندە ژی دێ ئاسایشا ڤەگوهاستنا خوینێ ل جیهانێ ب هێزتر لێ کەت و دێ هاریکاریا وان نەخۆشان ژی کەت یێن کو ژ بەر هندەک جۆرێن شێرپەنجێ ب شێوەیەکێ دەمکی ئەڤ پرۆتینە ژ دەست دابوون.
زانایان گۆت ژی کو ئەڤێ چەندێ دووماهی ب گەڕیانەکا 20 سالی یا تیمێ ڤەکۆلینێ ئینا، و نوکە دێ شێن چاڤدێریەکا گەلەک هوورتر و بێهێمنتر (سەلامەتتر) بۆ ڤان جۆرە نەخۆشان دابین کەن.
