گەشبینم تیما مە دێ هەڤڕكەكا بهێز بیت د خولێ دا
د داخۆیانیەكێ دا محیەدین تاها سەرۆكێ یانەیا ئاكرێ دیار كر بەرهەڤییێن تیما وان بەردەوامن و پلان و بەرنامە دانایە كو وەرزێ ئەڤ سالە باشترین شێوە بۆ هەدو خولێن پلا نایابا كوردستانێ و خولا پلا دویێ یا ئیراقێ بكەڤنە د هەڤڕكییان دا.
زێدەتر ناڤهاتی گۆت: بۆ وەرزێ نوو پشتی چەندین كۆمبوونێن جودا هاتینە كرن پێخەمەت ژلایێ تەكتیكی و هونەری و دەرۆنی ڤە باشتر بین ژ وەرزێن بوری و مەرەما مە نە بتنێ پشكدارییە، بەلكو پلان هاتیە دانان ئەم هەڤڕكییێ د هەردو خولێن كوردستانێ و ئیراقێ دا بكەین، ڕاستە ئەركێ مە ب سانەهی نابیت، لێ گەشبینم تیما مە دێ بیتە هەڤڕكەكا بهێز د خولێ دا
سەرۆكێ یانەیا ئاكرێ گۆت ژی: كادرێ ڕاهێنانێ و یاریزان ڕۆژانە د كارابوونەكا تەمام دانە و دێ بەردەوام بن ل سەر پلانا خۆ یا ڕاهێنانێ و یارییێن هەڤالینی، هەر ئەڤە ژی وەكۆ فاكتەرەكێ بنەڕەتی دبینیت بۆ پاراستنا ڕیتما یاریزانان ئەگەر بەروارێ دەستپێكرنا خولا نایابا كوردستانێ پاشكەڤتنەكا كەم ژی ب خۆ ڤە ببینیت.
ناڤهاتی گۆت: ژڤان هاتییە دانان كو ل 15 هەیڤا 11 خولا پلە دویێ یا ئیراقێ دەستپێبكەت ژ بەر ڤێ چەندێ چ ئاریشە نینە و ئامادەكاری بەردەوامن ژبەركو ڕاهێنەر و یاریزان هەموو ب هشیاری و بەرهەڤییەكا تەمام دانە.
سەرۆكێ یانەیا ئاكرێ خویاكر: ئەم ب پەیڕەوكرنا ئامادەكاریێن باش بۆ هەردو خولان ئامادەینە و ئارمانجا مە ئەوە ب هێز ڤە ڕكابەریێ ل سەر هەردو قارەمانیا خولا نایابا كوردستانێ و پلە دوییێ ا ئیراقێ بكەین.
