یاریزانێن پارێزگەهێ ڕێزێن پێشیێ ب دەستڤە ئینان
یاریزانێن یانەیێن دهۆك، سێمێل و گارە شیان كۆنترۆلا ڕێزێن پێشیێ د قارەمانییا ئیراقێ یا تێنسا ئەردی ل سەر ئاستێ كچان ب دەستڤە بینن، د هەڤڕكیێن واندا ئەوا ل ئەینییا بۆری ل یاریگەهێن یانەیا دهۆك ب پشكدارییا پێنچ یانەیان بۆ ماوەیێ سێ رۆژان یا بەردەوامبوو.
سەعید خەلیل ئەندامێ فدراسیۆنا تێنسا ئەردی یا ئیراقێ بۆ رۆژنامەیا ئەڤرۆ گۆت: ب پشكدارییا هەر ئێك ژ یانەیێن دهۆك، سێمێل، گارە، ئەلعلویە و كەلهە یا هەولێری هەڤركی ل سەر ڕێزێن پێشیێ یا قارەمانییا ئیراقێ ل سەر ئاستێ كچان دكرن و ئەنجامێن دووماهیێ بڤی شێوەیی بوون، یانەیا دهۆك ڕێزا ئێكێ هات كو بپشكدارییا هەردو یاریزانێن وێ زەلال سەعید و لارا ئاڤدەل، یانەیا سێمێل ل ڕێزا دویێ هات بپشكدارییا هەردو یاریزانێن وێ هانا ئاڤدەل و ڤینۆس گوهدار، یانەیا گارە ل ڕێزا سێیێ هات ب پشكدارییا سارا ئاڤدەل و نیرۆز سەعید، هەردوسان هەردو یانەیێن ئەلعلویە ژ بەغدا ڕێزا چارێ و كەلهە ژ هەولێرا پایتەخت ل ڕێزا پێنجێ هاتن.
ژلایەكێ دووڤە ناڤهاتی ئەوچەندە ژی گۆت: ئەڤ قارەمانییە ل دووڤ بەرنامەیێ سالانە یێ فدراسیۆنا تێنسا ئەردی یا ئیراقێ یە و مەرەم ژی ژێگرتنا یاریزانێن خودان شیان بۆ هەلبژارتیێ ئیراقێ پێخەمەت بەرهەڤی بۆ قارەمانیێن داهاتی ل سەر ئاستێ عەرەبی، ئاسیایی و نێڤدوەلەتی، دەستكەڤتێ هەرسێ یانەیێن پارێزگەهێ نیشانا وێ یەكێ یە كو یاریزانێن خودان شیان هەنە و گەشبینن دێ شێن ئەنجامێن باش دەستڤە ئینن.
سەعید خەلیل ئەوچەندە ژی دا زانین پارێزگەها دهۆكێ چاڤەڕێ دێ مێڤاندارییا قارەمانیەكا دی ل سەر ئاستێ كچان كەت كو تایبەت و یا ڤەكرییە بۆ هەر یاریزانەكا كچ ل 23ێ ڤێ مەهێ و دێ ل سەر ئاستێ 14 هەتا 30 سالی بیت و هێنە ڤاڤارتن، سیستەم دێ سەر دو كۆما بیت، هەر كۆمەك شەش نیڤان هێتە كرن، هەكە یاری بەر ب وەكهەڤیێ چوو، دێ یارییەكا ڤەبر ژ دەهـ خالان هێتە كرن بۆ دیاركرنا سەركەڤتی.
