نوونەرێن پارێزگەھێ دێ بزەحمەترین یاری ل ڤێ گەرێ ئەنجام دەن
ئەڤرۆ:
بریارە ئەڤرۆ و سوبەھی شەش یاری ژ گەرا شەشێ ژ خولا ھەرێما کوردستانێ یا تەپا پێ بھێنە ئەنجامدان کو ھەرسێ نوینەرێن پارێزگەھا دھۆک دێ بھێزترین یاریێن ڤێ گەرێ ئەنجامدەن ئەو ژی یانا دھۆک ل یاریگەھا خوە یا سیێ دێ مێڤانداریا یانا ھندرین یا ھەولێرێ کەت دیسان زێرەڤانی ژی ل یاریگەھا خوە بەرامبەر نەوروز یاریا خوە ئەنجام دەت و یانا زاخۆ ژی دێ بەر ب ھەولێرێ چیت بۆ ئەنجامدانا یاریا خوە بەرامبەر یانا پێشمەرگە یا ھەولێرێ و ھەمی یاری دێ ل دەمژمێر 2:30 پشتی نیڤرۆ بھێنە کرن.
ل دۆر یاریا ئێکێ ناڤبەرا یانا دھۆک و ھندرین دا حازم سالح راھێنەرێ یانا دھۆک بۆ رۆژناما ئەڤرۆ گۆت: یاری دێ یا بزەحمەت بیت بۆ تیما وان ژ بەرکو یانا ھندرین یاریکەرێن خودان شیان ھەنە لێ ئەنجامێن تیمێ یێن باش دێ زێدەتر ھاریکاریا تیمێ کەت بەردەوام بیت ل سەر سەرکەفتنان کو بارێ دەرونی یێ یاریکەران گەلەک یێ باشە دیسان ھەمی یاریکەرێ دێ بۆ ڤێ یاریێ د ئامادەبن تنێ ئەحمەد مەئمون نەبیت ئەوێ بەری نوکە تووشی ھنگافتنێ بوی لێ ئەو ب ئومێدن دێ خالێن یاریێ دەستخوە ڤە ئینن.
د یاریەکا دی یا ھەمان گەر دا ئەوا بریارە سوبەھی بھێتە کرن ناڤبەرا تیما زێرەڤانی و سەرکێشا خولێ یانا نەوروز دا بیت کو دھێتە ھژمارتن ب ھێزترین یاری ژ بەرکو نوکە ھەردو تیم دێ ھەڤرکیێ کەن بۆ کونترول کرنا سەرکێشا خولێ.
بۆ ڤێ یاریێ سلێمان رەمەزان راھێنەرێ یانا زێرەڤانیێ دیارکر ھەر یاریەکێ کاودانێن خوە یێن تایبەت ھەنە و ئارمانجا سەرەکی یا تیما وان دێ ئەو بیت سێ خالێن یاریێ دەستخوە ڤە بینن و سەرکێشیا خولێ ژ ڤێ تیمێ وەرگرین لێ ئەڤ چەندە دێ یا بزەحمەت بیت ژ بەرکو یانا نەوروز ھەتا نوکە خودان باشترین ھێلا بەرەڤانیێ یە ژ بەرکو چ گۆل ل سەر یانا نەوروز نە ھاتینە تومارکرن.
ژ لایێ خوە ڤە نوینەرا سیێ یا پارێزگەھێ تیما تەپا پێ یا زاخۆ دێ بەر ب ھەولێرێ چیت و یاریەکا دی یا بھێز بەرامبەر یانا پێشمەرگە یا ھەولێرێ ئەنجامدەت بۆ ڤێ یاریێ ئەمین یونس ھاریکارێ راھێنەرێ یانا زاخۆ دیارکر ئەو دێ ھەمی بزاڤان کەن سەرکەفتنێ د ڤێ یارییدا دەستخوە ڤە بینن سەرەرای کو ئەڤ چەندە یا ب ساناھی نابیت ژ بەرکو یانا پێشمەرگە چەندین یاریکەرێن خودان شیان زێدەباری راھێنەرەکێ باش بۆ تیما خوە ئیناینە لێ سەرکەفتنا مە د یاریا دووماھیێ دا ل سەر یانا ئارارات زێدەتر دێ زاخا یاریکەران بلندکەت.