ل شەکەفتا چارستین پارە بێ بڕینا پلێتێ دھێنە وەرگرتن
ئەڤرۆ نيوز:
پشتی وەلاتیەکێ پارێزگەھا دھۆکێ ب ناڤێ (ب، ئ) د گەل ھەڤالەکێ خوە ب ناڤێ (ر، م) ل رۆژا 21-6-2018ێ ل دەمژێر 4:30 ئێڤاری سەرەدانا شکەفتا چارستین ل باژێڕێ دھۆکێ کری ل پرسگەھا شکەفتێ داخوازا بڕینا پلێتا چوونا ژوور بۆ ھەر کەسەکی ب بھایێ 500 دیناران ژێ دھێتەکرن، لێ پشتی وان پارێ خوە دایەف پرسگەھێ ئەو کارمەندێ ل وێرێ پارەی ژێ وەردگریت و چو پلێتان بوو چوونا ژوور نادەتەڤێ، پشتی داخواز ژ وی کارمەندی دھێتەکرن پلێتا چوونا ژوور بدەتە ڤێ دبێژیتێ ھەوە پارێ خوە دا بێ پلێت ھەرنە ژوور دروستە.
ل دۆر ڤی بابەتی عەبدولکەریم چەمانکی، سەرۆکێ لیژنا باژێرڤانی و گەشتوگۆزار و خزمەتگۆزاریێن گشتی ل جڤاتا پارێزگەھا دھۆکێ بۆ رۆژناما ئەڤرۆ دیار کر کو بەری نوکە کەسێ ئەو ل سەر ڤێ چەندێ ئاگەھدار نەکرینە کو پارە ل شەکەفتا چارستین ل باژێرێ دھۆکێ بێ بڕینا پلێتێ ژ وەلاتیان دھێتە وەرگرتن و گۆت: “نابیت ل چو جھێن گشتی پارە بێ بڕینا پلێتێ ژ وەلاتیان بھێتە وەرگرتن ژ بەر ڤێ چەندێ ئەم وەکو جڤاتا پارێزگەھا دھۆکێ ھەر ژ ئەڤرۆ رۆژا 23-6-2018ێ دێ دووڤچوونا ڤی بابەتی کەین و دێ رێڤەبەرێ گشتی یێ شوونواران ژی ل پارێزگەھا دھۆکێ ل دۆر ڤی بابەتی ئاگەھدار کەین”.
ناڤھاتی ئاماژە دا وێ چەندێ کو ھەر وەلاتیەکێ گازندەکا ژ ڤی جۆری ھەبیت دشێت ب رێیا داخوازنامەکێ و کۆمکرنا ئیمزایان جڤاتا پارێزگەھا دھۆکێ ئاگەھدار بکەت داکو دووڤچوونێ ل سەر بکەت.