عادل ئیمام و مهسجێن رۆژنامهڤانى یێن گرنگ
ئیسماعیل تاهـر
هونهرمهندێ مهزنێ مسرى عادل ئیمام د زنجیرا درامى یا (عوالم خفیه) دا، ڤیا چهند مهسجێن گرنگ بگههینیت سهبارهت كێشه و ئارێشێن جڤاكى و مافێن خوارى ب هێزا دهستههلات و پاره و كپكرنا دهڤێ خهلكى و ڤهشارتنا تاوانێن مهزنێن د ناڤ جڤاكی دا، خانمهك دهێته كوشتن و پۆلیس دنڤیسین رهوشهكا خۆكۆشتنێ، كهرهستهیێن دهم ب سهرڤهچوویى دكهڤنه بازارى و سازیێن پهیوهندیدار خوه ل سهر بێدهنگ دكهن، كهرهستهیێن بێهۆشكهر ل ناڤ گهنجان بهربهلاڤ دبن و سازیێن فهرمى بێ ئاگههن، كوشتارهك دروست دبیت و تاوانبار بهرزهدبن.. و هۆسا ههتا دووماهیێ. هزر نهكهن سازیێن فهرمى دزانن و خوه بێدهنگ كریه، وى دهمى دێ بیته مهرگهسات..!! لێ تاوانبارێن ئاشۆپى د ڤى پرۆژێ درامی دا چاوا شیاینه تاوانێن خوه ل بهر خهلكى بهرزهكهن وهسا شیاینه ب رێكێن نهڕهوا و بهرتیلدان و ترساندنێ و پهیداكرنا پشتهڤانان د ناڤ سازیێن وهلاتیدا ل بهر دهزگههێن فهرمى ژى بهرزهكهن و بادهكێن ل دوووڤچوون و دادگههێ بدهنه گرتن.
خانمهكا سهماكار ل گهل كۆمپانیهكا بازرگانیا مهزن كاردكهت و پشتى نهینیێن وان دكهڤنه بهر ئاشكرابوونێ ب رێكا نڤیسینا هندهك هێما و پێزانینێن گرتى دهێته كوشتن و پاشى ئهو یاداشتنامه دكهڤنه دهستێ رۆژنامهنڤیسهكى و شیان و داهێنانێ ددهته كارى ههتا وان هێما و پێزانینێن مژهوى ڤهدكهت و مژار بۆ مژارێ دگههیته هندهك راستیان، بهلگهنامه و تشتێ پێدڤى پهیدا دكهت و دشێت بسهلمینیت كو كۆمپانى و كهسێن مهزن و ب هێز ل پشت تاوانێن مهزنن و چهندین ڕۆلان دگێرن، دهمێ تهنگاڤ دبن، ههمى رێكا بكاردئینن بۆ پاشڤهبرن و ترساندنا وى رۆژنامهڤانى، تشتێ گرنگ ئهڤهیه كو ستافێ رۆژناما وى و سازیێن پۆلیسان و دهزگههێن تایبهتمهند پشتا وى بهرنادهن، بهلكو بهروڤاژى پشتهڤانن و هاریكاریا وى دكهن بۆ ئاشكراكرنا تاوانباران و ژناڤبرنا نهخشه و پیلانێن وان، پاراستنا گیانێ وى ژ ههمى وان گهفێن لێ دهێنهكرن، ئهو پێرابوونێن زیانبهخشێن دژى وى دهێنهكرن ژتێكدانا ناڤودهنگێ كچا وى و برینداركرنا نهڤیێ وى و پێشتر رهڤاندنا وى نهبوونه رێگر ئهو سست و خاڤ ببیت و دهست ژكارێ خوه بكێشیت، بهلكو پشتى ههر ئاریشهكا بۆ دروست دبوو ئهو پتر رژد دبوو و ب دهروونهكێ گهرمتر كاردكر.
كچهكا وى و زاڤایێ وى دو قوربانیێن پرۆژێ وى یێ رۆژنامهڤانى بوون، ئهڤ چهنده نهبوو رێگر بهردهوامیێ بدهته كارى و ههردو گههاندنه سزایێن وان سهرهرایى كو نێزیكێن وى بوون، كهسێن بهێز و خودان دهستههلاتهكا مهزنا دراڤى گههاندنه سزایێ وان یێ ههژى سهرهرایى دراڤهكێ مهزن دگهل دهاته گۆتن، ل گهل ڤێ ژى ئهو رۆژنامهڤانهكێ بهرهنگاربوو وبزاڤ بۆ گهۆرینا حكومهتێ دكر لێ ب رێكێن یاسایى وكاركرن بۆ بهرژهوهندیێن گشتى، پرۆژێ وى بۆ ئهگهر ژمارهكا زۆرا وهزیران هاتنه لادان یان وان دهست ژكارى كێشا، ل دووماهیێ سهرۆك وهزیران گۆتێ ته وهزیر بۆ من نههێلان..!! لێ ب دیتنهكا زانستى هندهك خال ئاشكرا دبن ژ وان:
• كارێ ل دویڤچوونێ ب كهسهكى ب تنێ ڤه ناهێت، دڤێت ژمارهكا كارمهندێن سازیا راگههاندنێ دگهل وى كاربكهن وشیان ههمى بكهڤنه دخزمهتا راستیێدا، نهخاسم بۆ پهیداكرنا بهلگه وپێزانینان.
• گشت سازیێن پاراستنا ئێمناهیێ بكهڤنه كارى و بۆ راستیێ كاربكهن وئاسانكاریان بۆ رۆژنامهڤانى ودهزگههێن رۆژنامهڤانى بهردهست بكهن.
• كهسێن نزیك هاریكار وپشتهڤان بن و خو ل همبهرى گهفێن تاوانباران بگرن ونهبنه رێگر كار بۆ دیاركرنا راستیێ بهێته راگرتن ب بهانهیا ههبوونا گهفان.
• سازیێن فهرمى سهرهدهریهكا نیشتیمانى دگهل رۆژنامهڤانان بكهن خو ئهگهر سازیێن بهرهنگاریێ ژى بن وتاوانبار وخهمسار ژ دهستههلاتێ بن.
زنجیرا عوالم خفیه كو بهرههمێ سالا 2018 ێ بوو و ب درێژیا مهها رهمهزانا بۆرى دهاته پهخشكرن كارهكێ دى یێ سهركهفتى یێ هونهرمهندێ مهزن عادل ئیمامى بوو و داخوازیهك بوو سازیێن فهرمیێن وهلاتى پشتهڤان وهاریكاربن تاوان جڤاكى ڤهنهگریت ورهوشا وهلاتیان ژههر مهترسیهكێ بهێته دویرئێخستن و رێكێ بدهن میدیا وهك ئالاڤهكێ گرنگ رۆلێ خو د ئارامكرنا جڤاكى ونههێلانا تاوانێدا ببینیت.
