رۆسنه‌فت دێ ده‌ست ب ئه‌نجامدانا پرۆژێن خوه ل كوردستانێ كه‌ت
ئه‌ڤرۆنيوز:
كۆمپانيا رۆسنه‌فت مه‌زنه به‌رهه‌مئينه‌را په‌ترۆلا رووسى راگه‌هاند، ده‌ست ب پلاندانانێ كريه كو ل دووماهيا سالا 2018 ده‌ست ب پرۆژێن په‌ترۆلى ل هه‌رێما كوردستانێ بكه‌ت.
نوونه‌رێ كۆمپانيا رۆسنه‌فت يا رووسى، ل دووڤ ئاژانسا رويته‌رز گۆت” شانده‌كێ كۆمپانيێ ل گه‌ل ده‌ستهه‌لاتدارێن هه‌رێما كوردستانێ ل پارێزگه‌ها دهۆكێ به‌حسێ وان پێنگاڤێن پێدڤى كريه كو دێ بنه ده‌ستپێكا بجهئينانا رێككه‌فتنا ئوكتۆبه‌را سالا 2017 ێ ئه‌وا دناڤبه‌را وان دا هاتيه ئيمزاكرن”.
هه‌روه‌سا گۆت” پێشبينيێ دكه‌ين به‌رى دووماهيا سالا 2018، ده‌ست ب بجهئينانا پرۆژێن په‌ترۆلى بكه‌ين”.
كۆمپانيا رۆسنه‌فت يا رووسى ل گه‌ل حوكمه‌تا هه‌رێما كوردستانێ رێككه‌فتيه ل پێنج ده‌ڤه‌رين هه‌رێما كوردستانێ ده‌ست ب پشكنينێن جيولۆجى بكه‌ن، هه‌كه دسه‌ركه‌فتى بن تێدا، دێ ل سالا 2021 ده‌ست ب به‌رهه‌مئينانێ كه‌ن.
ل دووڤ پێزانينان كۆمپانيا رۆسنه‌فت يا رووسى كۆژمێ 400 مليۆن دۆلاران بۆ وه‌به‌رهێنانێ دوان پێنج ده‌ڤه‌رێن په‌ترۆلى دا دێ ده‌ت وپاشى نيڤا وى كوژمى دێ ل به‌رهه‌مێن وان كێلكان هێته دان.
ل دووڤ خه‌ملاندنێن ده‌ستپێكى، قه‌بارێ يه‌ده‌كێ په‌ترۆلا وان پێنج ده‌ڤه‌رێن هه‌ريمێ دگه‌هيته 670 مليۆن به‌رميل.