توركیا گەفان ل ئه‌مریكا دکەت
ئەڤرۆ نیوز ، زنار تۆڤی:
وه‌زیرێ ده‌رڤە یێ توركیا گەفان ل ئه‌مریكا دکەت و دبێژیت، بزاڤا سەپاندنا سزایان ب سەر دو وەزیرێن ئه‌وان دا ژ لایێ ئەمریکاڤە بێ بەرامبەر نامینیت.
مەولود چاوشئۆغلو وەزیرێ دەرڤە یێ تورکیا، ل ھژمارا تایبەتا خوە ل تۆرا جڤاکی یا تویتەری نڤێسیە، بزاڤا سەپاندنا سزایان ب سەر عەبدولحەمید گول وەزیرێ دادا تورکیا و سولەیمان سویلو وەزیرێ نافخۆیێ تورکیا، ژلایێ ئەمریکا ڤە بێ بەرامبەر نامینیت.
چاوشئۆغلۆ دبێژیت ژی، هەتا ئیدارا ئەمریکا تێنەگەهیت نەشێت داخوازیێن خوە یێن نە قانوونی ب ڤێ رێکێ دەستەبەر بکەت، ئەم نەشێین کێشێن خوە چارەسەر بکەین.
دوهی چارشه‌مبێ 1 تەباخێ وه‌زاره‌تا گه‌نجینا ئه‌مریكا سزا دانایە سەر هەر ئێک ژ سوله‌یمان سۆیلو وه‌زیرێ نافخۆىێ توركیا و عه‌بدولحه‌مید گول وه‌زیرێ دادا تورکیا، ب ئەگەرێ ده‌ستگیركرنا ئه‌ندرێل برۆنسۆن كو قه‌شه‌کێ ئه‌مریكیه و ل سالا 2016 ل توركیا هاتیە ده‌ستگیركرن ب تۆمه‌تا سیخوریكرنێ.
به‌لێ كۆچکا سپى هوورکایێن وان سزایان ئاشكرا نه‌كرینە.