پەرلەمانتارەک: بەرھەڤکرنا بۆدجێ رامانا نەمانا قەیرانێ یە
ئەڤرۆ نيوز، فاتما مزووری:
ھەرێما کوردستانێ د نھا دا کار ژبۆ وێ یەکێ دکەت کو پرۆژێ بۆدجێ د دەمێ خوە دا رەوانەیی پەرلەمانێ کوردستانێ بکەت، ئەندامەکێ پەرلەمانی ژی دیار دکەت کو ھەکە د دەمێ خوە دا پرۆژە بگەھیتە پەرلەمانێ ئەو ژی دێ د دەمێ خوە دا ب دووماھی ئینن.
دکتور سەلاحەدین ئەحمەد سەرۆکێ لژنا ئابووری ل پەرلەمانێ کوردستانێ بۆ ئەڤرۆ گۆت: ھەکە پرۆژێ بۆدجا ھەرێما کوردستانێ بۆ پەرلەمانی بھێتە ھنارتن دێ دووماھی ب وێ قەیرانا ھندە سالە ل کوردستانێ ھەیی دەرباز کەت”.
ژ سالا 2014ێ وەرە حوکمەتا عیراقێ ب بەھانەیێن جودا، بووجا ھەرێما کوردستانێ بڕیە و ھەتا نوکە ژ ب رەنگەکێ دروست رەوانە نەکریە، بەلێ حوکمەتا ھەرێمێ رێیێن جودا گرتینە بەر دا کو ڤێ ئاریشێ ب دووماھی بینیت، نوکە ژی ھەرێما کوردستانێ کار بۆ وێ چەندێ دکەت بۆدجێ 2019ێ رەوانەیی پەرلەمانی بکەت.
سەرۆکێ لژنا ئابووری ل پەرلەمانێ کوردستانێ دا زانین کو ئێک ژ مەرەمێن ھەرە گرنگ یێن پەسەندکرنا بۆدجەی ئەوە کو گرنگی ب گەشەپێدانا ئابووری بھێتە دان و تێچوویان کێم بکەن.
د. سەلاحەدین ئەحمەد گۆتژی: “گەلەک د دلخۆشین بۆدجە بھێتە پەرلەمانی و بھێتە پەسەندکرن ژ بەر کو حوکمەتا ھەرێما کوردستانێ گەلەک پێدڤی ھەنە ژبۆ گەشەپێدانا ئابووری و جڤاکی ژ ھەموو لایەکی ڤە.
سەرۆکێ لژنا ئابووری ل پەرلەمانێ کوردستانێ نەڤەشارت ژی کو ھەکە بۆدجە بھێتە پەسەندکرن، دێ ئاریشێن دارایی ژی ھێنە چارەکرن ژ بەر وێ چەندێ ژی یا ژ ھەموویێ گرنگتر ئەوە بۆدجە بھێتە پەرلەمانی و بھێتە پەسەندکرن.
ئەڤی پەرلەمانتاری خۆیا ژی کر کو ب گۆرەیی پەیرەوێ ناڤخۆ یێ پەرلەمانێ کوردستانێ ھەکە پرۆژێ بۆدجەیی بۆ پەرلەمانی بھێتە ھنارتن د دەمەکێ کورت دا پشتی ڤەکۆلین و دانوستاندنێ دێ پرۆژە ھێتە پەسەندکرن.
ب گۆرەیی ئەو پێزانینێن ل بەر دەست ئەڤرۆ نیوز د کۆمبوونا حەفتیا بۆری یا جڤاتا وەزیرێن ھەرێما کوردستانێ ژی دا گەنگەشە ل سەر بەرھەڤکرنا پرۆژێ بۆدجا ھەرێما کوردستانێ بۆ سالا 2019ێ ھاتیە کرن و وەزارەتا دارایی و ئابووری ژی ل حوکمەتا ھەرێما کوردستانێ جڤاتا وەزیران و سەرۆک وەزیر ئاگەھدار کرینە کو ئەوان ل گەل وەزارەتێن پەیوەندیدار دەست ب ئامادەکاریان کریە ژبۆ بەرھەڤکرنا بۆدجا ھەرێما کوردستانێ بۆ سالا 2019ێ.
