کۆمپانیا دانا غاز دێ 59 ملیۆن دۆلارێن دی ژ حوکمەتا ھەرێمێ وەرگریت
ئەڤرۆ نيوز:
کۆمپانیا دانا غاز دوھی رۆژا 1-10-2018ێ راگەھاند کو 59.5 ملیۆن دۆلارێن دی بۆ کارێ پرۆژێن ھەڤپشکێن ل ھەرێما کوردستانێ ژ حوکمەتا ھەرێما کوردستانێ وەرگرتینە، ب ڤێ چەندێ ژی سەرجەمێ گشتی یێ ئەو پارێ کۆمپانیێ د سالا 2018ێ دا ژ حوکمەتا ھەرێما کوردستانێ وەرگرتی گەھشتیە 439 ملیۆن دۆلاران.
د ھەمان راگەھاندن دا ھاتیە کو ب وەرگرتنا ڤی کۆژمێ پارەی ژ حوکمەتا ھەرێما کوردستانێ کۆمپانیا دانا غاو چو قەر ل دەف حوکمەتا ھەرێمێ نەماینە، وەرگرتنا ڤی کۆژمێ پارەی پشتی وێ چەندێ ھاتیە کو کۆمپانیێ 150 ملیۆن دۆلارێن دی ژ سەرجەمێ 400 ملیۆن دۆلاران کو حوکمەتا ھەرێما کوردستانێ دایە ھەڤپشکێن خوە، ل بن رێککەفتنا ھەیڤا تەباخا سالا 2017ێ وەرگرتیە بۆ دارایکرنا پلانا بەرفرەھکرنا زەڤیا پەترۆلێ یا کۆر مۆر.
دکتور پاتریک ئەلمان وارد، رێڤەبەرێ بجھئینانا کۆمپانیا دانا غاز دیار کر کو وەرگرتنا پارەی ب بەردەوامی و د دەمێ خوە دا بۆ کارێ وان ل ھەرێما کوردستانێ و عیراقێ دێ باوەریەکا زێدەتر ب وان دەت بۆ بەردەوامیدان ب وەبەرئینانێ و بەرفرەھکرنا بەرھەمئینانێ.
کۆمپانیا دانا غاز د راگەھاندنا خوە دا ئاماژە دایە وێ چەندێ ژی کو وان پلان بۆ زێدەکرنا بەرھەمئینانا گازا سرۆشتی ھەیە ب رێژا 25% ھەتا دووماھیا ئەڤ سالە، ھەروەسا پلان بۆ زێدەکرنا بەرھەمئینانێ ژی ھەیە ب رێژا 132% د سێ سالێن داھاتی دا.
