جوتیاره‌كێ گوندێ بالندا هنارێن ره‌ش به‌رهه‌م دئینیت
ئه‌ڤرۆ نیوز، نه‌وزاد هلۆرى:
جوتیاره‌كێ گوندێ بالندا یا سه‌ر ب ده‌ڤه‌را بارزان رابوویه ب چاندن و به‌رهه‌مئینانا هنارێن ره‌ش وه‌كو تێست، وه‌كو ئه‌و دده‌ت دیاركرن ئه‌گه‌ر حوكمه‌ت هاریكاریا وى بكه‌ت دێ كه‌ت پروژه و به‌رفره‌هـ كه‌ت.
عه‌بدولجه‌بار بالندى، جوتیاره‌كێ گوندێ بالندایه ل ده‌ڤه‌را بارزان بۆ ئه‌ڤرۆ نیوز گۆت: (ئه‌ڤه نێزیكێ سێ سالایه من هژماره‌كا هنارێن ره‌نگ ره‌ش ل گوندێ بالندا وه‌كو تێست چاندینه و سوپاس بو خودێ ئه‌ڤ ساله هاتنه به‌رهه‌مى و سه‌ركه‌فتن ئینایه، به‌لێ هژماره‌كا زور نینه و كێمن چونكى تنێ تێسته).
زێده‌تر گۆت: (ئه‌ڤ هناره ژ وان هنارانه كو به‌رهه‌مه‌كێ باش دده‌ن، تامه‌كا خوش و جودا هه‌یه و ب هه‌ردوو ره‌نگێن ترش و شیرینن، ئه‌گه‌ر لایه‌نێن شوله‌ژێ هاریكاریا من بكه‌ن، ئه‌ز دێ كه‌م پرۆژه و گه‌له‌كا چینم).
جوتیارێ ناڤبرى دیاركر ژى كو دبیت ل هنده‌ك ده‌ڤه‌رێن دى ئه‌ڤ جورێ هناران هه‌بیت به‌لێ ل ده‌ڤه‌را بارزان هه‌تانوكه نه‌بوینه و زێده‌تر گۆت: (ل دوماهیا وه‌رزێ پایزێ ئه‌ڤ هناره چێدبن، و زێده‌تر ژ هنارێن دن به‌رگریێ دكه‌ن و دمینن).
