رۆژبوونا محه‌مه‌د (س) دێ دو جاران كه‌ڤيته د 2015 دا
ئه‌ڤرۆ نيوز، ناجی به‌ده‌ل:
زانایێن فه‌له‌كناسی دبێژن سالا 2015 دیارده‌یه‌كا سه‌رسورهێنه‌ر ب خوه ڤه دگریت كو ئه‌و ژی هه‌ر 33 سالا جاره‌كێ روو دده‌ت، كو د سالێ دا دو جاران ژ دايكبوونا پێغه‌مبه‌رێ خودێ محه‌مه‌ده سلاڤێن خودێ ل سه‌ر بن.
مه‌لا ئه‌حمه‌ده جه‌لاله‌دین رێكانی بو ئه‌ڤرۆ نیوز گۆت: “ل سه‌رده‌مێ موسلمانان و سالژمێرا كوچی دهاته بكارئينان ل گوری رۆژێن هه‌یڤێ بوویه، رۆژێن هه‌يڤێ ژى ب درێژاهيا سالێ 10 هه‌تا 11 رۆژان جوداهى يا ل گه‌ل يا ئه‌ردى هه‌يى، ژ به‌ر ڤێ چه‌ندێ ژى دو جاران بوونا پێغه‌مبه‌رێ خودێ دكه‌ڤيته تێدا”.
ناڤبری ئه‌و چه‌نده ژی دیاركر رۆژا ژ دایكبونا پێغه‌مبه‌رێ خودێ محه‌مه‌د سلاڤێن خودێ ل سه‌ر بن يا جێگیره ل گوری سالژمێرا كوچی كو (12 ره‌بیع اول) د هه‌ر ساله‌كا كوچی دا و ئه‌ڤه ب خو رامانا وێ چه‌ندێ دده‌ت كو هه‌موو رۆژ ب پیرۆزی و بها دهێنه هه‌ژمارتن ل ده‌ڤ موسلمانان”.
مه‌لا ئه‌حمه‌د رێكانی دا زانین كو ئه‌ڤ ساله دو جارا ژ دایكبوونا سه‌روه‌رێ پێغه‌مبه‌ران دێ هێته گران، (12 ره‌بیع اول 1436 هه‌مبه‌ری 3/1/2015) و یا دويێ (12 ره‌بیع اول سالا كوچی 1437 كو هه‌مبه‌ری سالا زيانى 24/12/2015 یه).
ئه‌ڤ دیارده ل سالا 1982 روودایه و دهێته پێشبینیكرن ل سالا 2047 دووباره ببیته‌ڤه.
