دژه تیرۆرا هه‌رێمێ: رزگاركرنا دو سنێلێن سعوودى، ب رێیا هه‌رێمێ بوویه
ئه‌ڤرۆ نیوز: نه‌وزاد هلورى
دژه تیرورا كوردستانێ د راگه‌هاندنه‌كێ دا هورده‌كاریێن زڤراندنا دو سنێله‌یان بۆ سعودیێ به‌رچاڤكرن و راگه‌هاند، زڤراندنا وان دو سنێله‌یان چ په‌یوه‌ندى ب توركیا ڤه نینه، به‌لكو د رێیا هه‌رێما كوردستانێ بو كونسولخانا سعودیێ هاتیه‌كرن.
ده‌قا راگه‌هاندنێ: راستییا ل بارا راده‌ستكرنا دوو سنێله‌یێن سعودیێ بو وه‌لاتێ وان
كه‌نالێ ئه‌سمانیێ (العربیه) ل رێكه‌فتى 31ێ ئادارێ، د راپورته‌كێ دا به‌حس ل زڤراندنا دوو سنێله‌یێن سعودیێ دكه‌ت، كو ژلایێ بابێ وانڤه بربوونه دناڤ رێكخراوا تیرورستى یا داعش ل سوریا، هێزێن ئاسایشا سعودیێ شیان ل وه‌لاتێ توركیا وان بزڤرینن وه‌لاتێ خوه، ئه‌و دوو سنێله كو ناڤێت وان، عه‌بدولناسر عه‌بدوللا دژیێ 15 سالى دا، ئه‌حمه‌د ناسر عه‌بدوللا كو دژیێ 12 سالیێ دا بوون، ل هه‌یڤا ته‌مووز یا سالا 2014 ب مه‌ره‌ما گه‌شتوگۆزار ل گه‌ل بابێ خوه دچنه وه‌لاتێ توركیا، پاشان بابێ وان ئه‌وان دبه‌ته دناڤا رێزێن رێكخراوا تیرورستى یا داعش ل سوریا، پشتى هه‌یڤه‌كێ بابێ وان د ناڤ رێزێن رێكخراوا تیرورستى یا داعش دهێته كوشتن، هه‌ردوو سنێله بو ده‌مه‌كێ درێژ ژلایێ دانعه‌مره‌كێ دهێنه بخودانكرن.
ل رێكه‌فتى 26ێ هه‌یڤا بوورى، هه‌ردوو سنێله عه‌بدولناسر عه‌بدوللا و ئه‌حمه‌د ناسر عه‌بدوللا دگه‌هنه خالا سنوورى یا پێشیابیرێ دناڤبه‌را هه‌رێما كوردستان و رۆژئاڤایێ كوردستانێ، ژلایێ رێڤه‌به‌ریا گشتى یا دژه تیرورا كوردستانێ دهێنه وه‌رگرتن و پاشان راده‌ستێ كونسولگه‌ریا سعودیێ ل هه‌ولێر دهێته‌كرن و دهێنه زڤراندن بو وه‌لاتێ وان، ئه‌ڤ یه‌ك دده‌مه‌كێ دایه كو پروسه‌یا زڤراندن و راده‌ستكرنا وان هه‌ردوو سنێله‌یێن سعودیى ل هه‌رێما كوردستانێ ب هه‌ڤكاریا دژه تیرورا كوردستانێ هاتیه ئه‌نجامدان، چ په‌یوه‌ندى ب وه‌لاتێ توركیا ڤه نه‌بویه، وه‌كو د راپورتا كه‌نالێ ئه‌سمانیێ ئه‌لعه‌ره‌بیه هاتیه به‌حسكرن.
