ئاموژگاریا كوچه‌ر بیركار بۆ قوتابیان
ئه‌ڤرۆ نیوز:نه‌وزاد هلورى
پروڤیسور كوچه‌ر بیركار د چارچوڤێ سمیناره‌كێ دا كو دوهى ل هه‌ولێرێ بۆ قوتابى و ماموستایان پێشكێشكر ب تایبه‌تى بۆ وان ماموستا و قوتابیێن كو حه‌زا بیركاریێ هه‌یى، دیاركر كو نابیت چاڤێ وان ب تنێ ل حوكمه‌تێ بیت كو هه‌ر تشتى بۆ بكه‌ن، به‌لكو پێدڤى یه قوتابى بخوه پێنگاڤان بهاڤێژیت.
بیركار كو خه‌لاتێ فێلدز د بیركاریێ دا بده‌ستخوڤه ئینایه گۆت : ژیانا مرۆڤى هه‌موو گرێدایه ب بیركاریێ ڤه، بیركارى ب تنێ هژمار و هاوكێشه نینه كو د په‌رتوكان دا هاتیه نڤیسان، به‌لكو بیركارى ب درێژاهیا دیرۆكا مرۆڤاتیێ دا په‌یوه‌ندى ب هه‌ر تشته‌كێ زانستى ڤه هه‌یه.
زێده‌تر گۆت: (پێدڤى یه مرۆڤ لسه‌ر حه‌زێن خوه به‌رده‌وام بیت، هه‌تا خوه ئه‌گه‌ر تووشى شكه‌ستنێ ژى ببیت، به‌لكو به‌رده‌وام بوون دێ مرۆڤى گه‌هینیته هه‌ر ئارمانجه‌كێ، ئه‌گه‌ر مرۆڤ تشته‌كێ بخوازیت پێدڤى یه بزاڤێ بۆ بكه‌ت و خوه بۆ ماندو بكه‌ت، خراپترین تشت ئه‌وه كو ئه‌م روونین خوارێ چ تشتان نه‌كه‌ین و چاڤه‌رێ ده‌ستهه‌لات و حوكمه‌تێ بكه‌ین، جهێ داخێ یه كو ئه‌ڤ یه‌ك خراپترین تشت بوو دده‌ما چه‌ند روژێن بورى من ل كوردستانێ دیتى.
ناڤبرى دیاركر ژى كو پێدڤى یه مرۆڤ بزاڤێ بكه‌ت ئه‌و تشتێ د سه‌رى دا هه‌یى ده‌ستخوڤه بینیت و گۆت ژى: (دڤێت ژ خوه پرسیار بكه‌ین مه چ ل گه‌ل هه‌یه و دێ شێن چ كه‌ین و چ ب مه هێته‌كرن، نه‌كو بێژین دێ حوكمه‌ت بۆ من چ كه‌ت.
دهێته زانین كو بیركار ماموستایێ زانكویا كامبریج یا بریتانى یه و خه‌لكێ باژێرێ مه‌ریوان یا رۆژهه‌لاتێ كوردستانێ یه.
