کێمبوونا ئاڤێ وەلاتیێن چەند تاخێن زاخۆ دلگران کرینە
ئەڤرۆ نیوز، عەلی حاجی:
دەمێ چەند رۆژایە ل ھندەک تاخێن باژێرێ زاخۆ ئاڤ ب دروستی ناگەھیتە مالان و گەھشتیە وی رادەیی ئێدی خەلک نەچار بوویە ئاڤێ ب تانکەران بکریت.
رێوان زاخۆیی ئێک ژ وەلاتیێن تاخێ عەباسیێ یە بۆ ئەڤرۆ نیوز دیار کر، زێدەتری حەفتیەکێ یە ئاڤا تاخێ وان کێمبوویە و ھەر سێ رۆژان دەمژمێرەکێ ئاڤ بۆ مالێن وان دھێتە بەردان و گۆت: “ئەو دەما ئاڤ دھێت ژی کارەبا گشتی نینە ھەتا ئاڤ ب دروستی بگەھیتە مالێن مە، ھەر چەندە ئەم نێزیکی کێلومەترەکێ ژ پرۆژێ ئاڤا زاخۆ د دوورین، بەلێ ئەم بۆ ئاڤێ دنالین، ئێدی مە ھزر ل وێ چەندێ کری یە ئاڤێ بۆ خوە بکڕین، ژ بەر کو ئاڤ گەلەکا کێمبووی، لەو ھیڤیدارین چارەک ل ئاریشا مە بھێتە کرن، مالێن ب رەخ تاخێ مەڤە ئاڤا مالێن وان یا بەردەوامە و یا مالێن تاخێ مە نینە یانژی یا کێمە”.
ھاشم ئیبراھیم، رێڤەبەر ئاڤا زاخۆ ل دۆر ڤێ ئاریشێ بۆ ئەڤرۆ نیوز گۆت: “ژ بەر کو ماتورێن ئاڤا زاخۆ بەردەوام کار دکەن و ئاڤ ژی گەلەک یا شێلی بووی و خیز دھێتە د وان ماتوران دا؛ یا بوویە ئەگەر سێ ماتورێن پرۆژەی ب راوەستن، ئێک ژ ئەگەرێن سەرەکیێ کێمبوونا ئاڤێ ل ھندەک تاخان ئەڤ چەندەیە، ھەر چەندە د نوکە دا ئەم یێ کار ل سەر چارەکرنا ڤێ ئاریشێ دکەین، بەری نوکە ژی ئەڤ ئاریشە ل چەند تاخەکێن دیتر ژی ھەبوو، بەلێ ھاتە چارەکرن”.
