فه‌هيم عه‌بدولا: هه‌تا نها ب فه‌رمى بريار ل سه‌ر گوهۆڕينێن پارێزگه‌ها دهۆكێ نه‌هاتيه دان
ئه‌ڤرۆ نيوز:
سه‌رۆكێ جڤاتا پاريزگه‌ها دهۆكێ راگه‌هاند كو ل گه‌له‌ك ده‌زگه‌هێن راگه‌هاندنێ ده‌نگويێ گوهۆڕينێن ئيدارا پارێزگه‌ها دهۆكێ به‌لاڤ بووينه، به‌لێ هه‌تا نها ب فه‌رمى چو بڕياره‌ك د وێ ده‌ربارێ دا نه‌هاتيه دان.
فه‌هيم عه‌بدولا حه‌مۆ، سه‌رۆكێ جڤاتا پارێزگه‌ها دهۆكێ، بۆ مالپه‌رێ فه‌رمى يێ پارتى ديموكراتى كوردستان گۆت: “ده‌ما حوكمه‌ته‌كا نوو دهێته پێكئينان، گوهۆڕين ژى د ئاسايى نه و ئه‌وليه‌تا حوكمه‌تا نوو ژى رێكخستنا وه‌زاره‌تا و چاره‌كرنا كێشێن ناڤبه‌را هه‌رێم و به‌غدايه و پاشان ژى گوهۆڕينێن د ئيدارێن پارێزگه‌هان دا، به‌لێ هه‌تا نها چو تشته‌كێ فه‌رمى بۆ مه نه‌هاتيه كو دێ گوهۆڕين هێنه كرن”.
سه‌رۆكێ جڤاتا پارێزگه‌ها دهۆكێ گۆتژى: “نها ده‌نگويێن زۆر به‌لاڤ بووينه ده‌رباره‌ى گوهۆڕينێن ئيدارا پارێزگه‌ها دهۆكێ و به‌حسا گه‌له‌ك ناڤان ژى دهێته كرن، به‌لێ هێشتا چو ناڤێن فه‌رمى نه‌هاتينه به‌لاڤكرن و هه‌موو پێشبينى نه، ژ به‌ر هندێ كاره‌كێ باش نينه تشته‌ك يێ فه‌رمى نه‌بيت و بهێته به‌لاڤكرن و ئه‌ڤه دبيته ئه‌گه‌ر ئه‌و ميديايێن به‌لاڤ دكه‌ن راستگۆييا خوه ژ ده‌ست بده‌ن، ژ به‌ر هندێ پێدڤيه تشت يێ فه‌رمى بيت پاشى بهێته به‌لاڤكرن”.
فه‌هيم عه‌بدولا حه‌مۆ نه‌ڤه‌شارت كو دێ گوهۆڕين هێنه كرن و دبيت پارێزگار و جڤات و رێڤه‌به‌رێن گشتى و قايمقام و رێڤه‌به‌رێن ناحيا ژى ب خوه ڤه بگريت، “گه‌له‌ك ژى يا گيرۆ بوويى” به‌لێ “هه‌تا نها چو تشته‌كێ فه‌رمى نينه”.