سەرۆکێ حزبەکا عیراقی: حەشدا شەعبی و پەکەکە سەرپێچیێن مەزن ل دەشتا نەینەوا دکەن
ئەڤرۆ:
سەرۆکێ حزبەکا عیراقی رەخنێن توند ئاراستەی حەشدا شەعبی و پارتیا کارکەرێن کوردستانێ (پەکەکە) کرن و تۆمەتبار کرن ب ئەنجامدانا سەرپێچیێن مەزن ل دەشتا نەینەوا.
غەیس ئەلتمیمی، سەرۆکێ حزبا ھاولاتیبوون یا عیراقی راگەھاند” دەستەیا حەشدا شەعبی ھاریکاریا پارتیا کارکەرێن کوردستانێ (پەکەکە) و رێکخستیێن ب سەر وێ ڤە دکەت ل دەڤەرێن دەشتا نەینەوا”.
غەیسی گۆت ژی” حەشدا شەعبی و پەکەکە پێکڤە کریارێن رەڤاندنێ و کوشتنێ و دەست ب سەرداگرتنا مولک و ئەرد و خانیان ل دەشتا نەینەوا ئەنجام ددەن”.
وی سەرۆکێ حزبا ھاولاتیبوون یا عیراقی ھوشداری ژی دا کو کریارێن گوھۆرینا دیموگرافی ل دەڤەرێن گرێدای دەشتا نەینەوا دھێنە ئەنجام دان ب ئیمزایا حوکمەتا عیراقێ و ب پشتەڤانیەکا دیار ژ دەستھەلاتا دادوەری و جڤاتا نوونەرێن عیراقێ”.
دھێتە زانین ل ٩ چریا ئێکێ ٢٠٢٠، ھەرێما کوردستانێ و بەغدا رێککەفتبوون ل سەر چارەسەرکرنا کێشێن ل قەزا شنگالێ ھەین کو دھێتە ھژمارتن ئێک ژ دەڤەرێن ناکۆکی ل سەر ھەی د ناڤبەرا ھەردو لایەنان دا.
ل دووڤ وێ رێککەفتنێ پاراستنا ئێمناھیێ ل وێ دەڤەرێ دێ ژلایێ ھێزێن ئەمنی یێن فیدرالی ڤە ھێتە گرەنتیکرن ب ھەڤکاری ل گەل ھێزێن ھەرێما کوردستانێ و دەرکرنا ھەموو گرۆپێن چەکدار یێن نە قانوونی بۆ دەرڤەی قەزا شنگالێ ژ وان ژی پەکەکە و رێکخستیێن گرێدای وێ.
ل دەستپێکا ھەیڤا کانوونا ئێکێ ٢٠٢٠، حوکمەتا عیراقێ راگەھاند کو وێ دەست ب بجھئینانا وێ رێککەفتنێ کریە و ھەموو گرۆپێن چەکدار دەرکرینە، بەلێ حوکمەتا ھەرێما کوردستانێ دیارک رکو چەکدارێن پەکەکێ ل دەڤەرێ یێن ماین و ھەتاکو ھندەک ھێزێن خوە یێن دی ژی ژ سووریێ ئیناینە.
