روسیا و ئه‌مریكا ل ئوكرانیا گه‌فان ل هه‌ڤدو دكه‌ن
ب، سه‌رجان مه‌حمود:
ل هه‌رێما دۆنباس یا ل سنورێ روسیا شه‌ره‌كی دژوار د ناڤبه‌را سوپایێ ئوكرانیا و چه‌كدارێن مانۆروسیا ده‌ستپێ كریه و ب ده‌هان كوشتی و بریندار ژ هه‌ر دو ئالیان هه‌نه و د ڤێ مژارێ دا روسیا حوكمه‌تا ئوكرانیا و ئه‌مریكا تۆمه‌تبار دكه‌ت و ئه‌مریكا و ناتۆ ژی روسیا ب هه‌ولدانا پارچه‌كرنا ئاخا ئوكرانیا تۆمه‌تبار دكه‌ن و ژ روسیا دخوازن سه‌ربازێن خوه ژ سنورێ ئوكرانیا دوور بكه‌ت و ده‌ست ژ پشته‌ڤانیكرنا چه‌كدارێن ل رۆژهه‌لاتێ ئوكرانیا به‌رده‌ت.
دیمیتری پیسكۆڤ په‌یڤدارێ سه‌رۆكێ روسیا راگه‌هاند كو سه‌ده‌مێ ده‌ستپێكرنا شه‌رێ د ناڤبه‌را ئوكرانیا و چه‌كدارێن پاراستنا رۆژهه‌لاتێ ئوكرانیا دا ژ به‌ر هێرش و سیاسه‌تا شاش یا حوكمه‌تا ئوكرانیا بوویه و ناتۆ و ئه‌مریكا ژی سوپایێ ئوكرانیا بۆ شه‌ره‌كی دژوار یێ هه‌رێمی هان دده‌ن و گۆت: (به‌ری نها به‌رێز پوتین هۆشداری دابوو حوكمه‌تا ئوكرانیا كو خوه ژ شه‌ره‌كی وه‌سا دوور بكه‌ت و هه‌كه به‌رده‌وام ئاگرێ شه‌ر هلكه‌ت و ل دووڤ ناتۆ و ئه‌مریكا بچیت پاشه‌رۆژا وێ دێ گه‌له‌ك خراب بیت و دڤێت سوپایێ ئوكرانیا ڤه‌گه‌ریته ڤه سنورێ خوه یێ كو ب ئاگربه‌ستێ هاتیه دیار كرن).
هه‌ر د ڤێ مژارێ دا سیرگێی لاڤرۆڤ وه‌زیرێ ده‌رڤه یێ روسیا ژی راگه‌هاند ئه‌و وه‌سا باوه‌ر دكه‌ت له‌شكرێ ئوكرانیا دزانیت كو شه‌ره‌كی گه‌رم ل هه‌رێمێن دۆنباس، لوهانسك و دۆنتیسك دێ چه‌ند مه‌ترسیێ دروست كه‌ت لێ سیاسه‌تمه‌دارێن ئوكرانیا ژ ئه‌نجامێن خراب یێ شه‌ری ئاگه‌هدار نینن.
