ئورۆپا سه‌باره‌ت ب روسیا داخوازه‌كێ ژ ئه‌مریكا دكه‌ت
ئاژانسا بلۆمبیرگ یا نووچه‌یان راگه‌هاند كو به‌رپرسێن ئێكه‌تیا ئورۆپا نامه‌كا فه‌رمی كو ژ چه‌ند خالان پێك دهێت بۆ ئه‌مریكا هنارتینه و تێدا داخواز ژ ئه‌مریكا كرینه كو ژ بۆ شه‌رێ ل دژی روسیا، چاره‌سه‌ركرنا پرسێن ئێمناهیێ و ئالۆزیێن دی یێن ل جیهانێ هاریكاریا هه‌ڤدو بكه‌ن، ژ به‌ر هندێ ژی نها به‌رپرسێن ئورۆپا چاڤه‌رێی به‌رسڤا ئه‌مریكا نه.
هه‌مان ئاژانسێ ئه‌و یه‌ك ژی دیار كریه كو روسیا بوویه مه‌ترسیه‌كا گه‌له‌ك مه‌زن بۆ به‌رژه‌وه‌ندیێن ئورۆپا و بێگومان هه‌موو وه‌لاتێن ئه‌ندامێن ناتۆ ژ بزاڤێن روسیا دلگرانن و ئه‌و یه‌ك ژی بوویه ئه‌گه‌رێ هندێ كو به‌رپرسێن ئێكه‌تیا ئورۆپا هزر د هندێ دا بكه‌ن كو ل گه‌ل ئه‌مریكا به‌ره‌یه‌كێ نوو ئاڤا بكه‌ن دا بشێن رێگریێ ل زێده‌گاڤیێن روسیا بكه‌ن، لێ هه‌تا نها دیار نینه كا دێ هه‌لویستێ ئه‌مریكا ل هه‌مبه‌ر داخوازیا وه‌لاتێن ئێكه‌تیا ئورۆپا چ بیت؟ چونكو دبیت ئیدارا بایدن ژی هنده‌ك داخوازی ژ ئورۆپا هه‌بن.
چاڤدێرێن سیاسی ژی دیار دكه‌ن كو هه‌لویستێ توند یێ روسیا ل دژی ئوكرانیا و ده‌ستێوه‌ردانێن روسیا د كاروبارێن هنده‌ك وه‌لاتێن ئورۆپا دا وه‌سا كریه كو ئێدی وه‌لاتێن ئورۆپا پێكڤه هزر د هندێ دا بكه‌ن كو ل دژی روسیا راوه‌ستن، چونكو به‌ری نها تنێ ئه‌لمانیا و فره‌نسا هه‌لویستێ خوه دیار كربوون لێ نها پرانیا وه‌لاتێن ئێكه‌تیا ئورۆپا ژ هه‌لویستێ روسیا دلگرانن و وه‌كو مه‌ترسی ل سه‌ر به‌رژه‌وه‌ندیێن خوه دبینن، ژ به‌ر هندێ ژی ره‌نگه مه‌ترسیا روسیا وه‌سا بكه‌ت كو ئه‌مریكا و وه‌لاتێن ئێكه‌تیا ئورۆپا پتر ژ جاران ل دژی روسیا پێكڤه كار بكه‌ن.
