وه‌غه‌رێن دوور.. ل جانێ جانی نانهیێن
عارف حیتو
(1)
هه‌كو پێكڤه چووینه گاره‌ی
كه‌ڤره‌كێ ب عه‌شقێ داخدایی و
داره‌كا خه‌مبار و دامای
ل هیڤیا ئاخینكێن مه ماتمایی
ئاوڕه‌كا باركری ب فندا ژیانێ و
نوو حه‌زه‌كا گوندیكانی..
تو د هه‌مبێزا مندا چاندی
ب تنێ ماچه‌ك تێرا هه‌بوو
كو به‌لگان بێخته سه‌مایێ و
ئه‌وی كه‌ڤرێ ب عه‌شقێ داخدای
خوه پاڤێت سیبه‌را دارێ و هێدی بێژتێ
هێشتا یا مای..
خوه نه‌ده ده‌ستێ هوڕه‌بای..!
*
(2)
هه‌كو ل ده‌ریایێ سوار بووین و
پێلێن ئاریای.. یاری ب هه‌ستێن مه دكرن
من نه‌دزانی كا چ قاپیت ل به‌ر ژینێیه
یان كا چاوا عه‌شق دمرن..!
ب تنێ- ب تنێ، لێڤێن ته یێن ئاگر پێڤه
من ددیتن و ژین ژێ دباری
ده‌رێ رێك و وه‌غه‌رێن دوور
ل مه ڤه‌دكرن.
*
(3)
من ته‌ڤ داستانێن ئه‌ڤینیێ
كرنه سیپه و به‌ردانه سه‌ر دلێ ره‌به‌ن
دلی ژی تو ژێ بژارتی و كریه وه‌ته‌ن
لێ چ هه‌وال.. من ژ هاتنا ته نه‌زانین
كو ژیانێ پێ رۆن كه‌ی و
عه‌شقا بێگه‌رد بۆ بكه‌ی كه‌په‌ن…!
*
(4)
هه‌كو تو چوویی
ئه‌ز كه‌فتمه به‌ر دیواران
وه‌كو هه‌ر ره‌وشه‌كا دی یا
پێنگاڤ گه‌زتی و تێدا شكه‌ستی
من پرسیار دكر ژ رێباران
كانێ سه‌متا ته ل كیڤه‌یه و
ب كیژان دارێڤه نوچه‌یه
دا كوونێ خوه لێ دابنێم ب سه‌ربه‌ستی!
ژ دووریا ته.. گوپالێ مفره‌قێ حه‌لیا و
گوشت ژ له‌شێ من هه‌لوه‌ریا
ب تنێ یێ مایم خوین و هه‌ستی.
*
(5)
ل ڤێ كێلیكێ..
ئه‌ز یێ پیر و تو ژی یا پیر
هه‌ر ئێك د قولاچه‌ك ڤه‌ده‌رڤه
بیره‌هیان دجوین بێ ته‌كبیر
نه ته زانی عه‌شقێ بكه‌ی و نه من زانی
نێزیك كه‌م خه‌ون و حه‌زێن دوور..!
