سه‌لكه‌كا له‌یمونان
هه‌لبه‌ستا: ئه‌حمه‌د عبدولموعتی حیجازی*
وه‌رگێڕان : حه‌سه‌ن سلێڤانه‌یی
سه‌لكه‌كا له‌یمونان
ل ژێر تیرۆژكێن رۆژا شاریای
ئو كوڕكی ب ده‌نگه‌كێ خه‌مگین قیری یه:
“بیست ب قورشه‌كێ
ب ئێك قورشی بیست”
***
سه‌لكه‌كا له‌یمونان د ئه‌لندێ دا
گوند ل پشت خوه هێلا
هه‌تا ڤی ده‌مێ مه‌لعین
كه‌سك بوو، خوناڤێ گرتی بوو
ل به‌ر شه‌پۆلێن سیهێ مه‌له‌ڤانی دكر
د خه‌وا خوه یا كه‌سك دا
بووكا بالنده‌ی بوو
وه‌ی!
كێ ترساند؟
كیژ ده‌ست برسی بوو، ل ڤێ ئه‌لندێ چنی؟
ل سه‌رێ ڤێ سبێ
بۆ جاددێن تێر خه‌لك و خه‌ندقی هلگرت
– پێ – ڕاناوه‌ستن ، تڕومپێل ب هێزا پانزینێ دبه‌زن
ژارێ له‌یمونێ
كه‌س بێهنا ته ژی ناكت و
رۆژ سه‌رده‌رێ ته هشك دكت
له‌یمونێ!
ئو كوڕكێ ئه‌سمه‌ر دبه‌زت
ب ترومپێلان ڕا ناگه‌هت
“بیست ب قورشه‌كێ
ب ئێك قورشی بیست”
***
سه‌لكه‌كا له‌یمونان ل ژێر تیرۆژكێن رۆژا شاریای
چاڤێن من ڤێكه‌تن
گوند هات بیرا من
* ئه‌حمه‌د عبدولموعتی حیجازی: * هه‌لبه‌ستڤان و ره‌خنه‌گره‌كێ مسری یه ، ل سالا 1935 ل منوفیه ژ دایكبوویه.
* ژ سه‌ركێشێن هه‌لبه‌ستا ئه‌ره‌بی یا هه‌ڤجه‌رخه *پشكداری د گه‌له‌ك فیسته‌ڤال و دیدارێن وێژه‌یی ل وه‌لاتێن ئه‌ره‌بی وئوروپی كریه.
* ل زانكۆیێن فه‌ره‌نسا وه‌ك ماموستایی هه‌لبه‌ستا ئه‌ره‌بی كاركریه.
*ریڤه‌به‌رێ نڤیسینا كۆڤارا (صباح الخیر) بوو.
* ل رۆژناما (الاهرام) كاركریه، بۆ ده‌مه‌كێ درێژ سه‌رنڤیسه‌رێ كۆڤارا (إبداع) بوویه.
* خودانێ -مالا هه‌لبه‌ستێ یه -مالا ستییا وه‌سیله – ل قاهیرا (ل ته‌موزا 2010) من ب ئاماده‌بوونا وی هه‌لبه‌ست ب كوردی و ئه‌ره‌بی خواندن.
ژ دیوانێن وی:
باژێرێ بێ دل 1959، ئوراس 1959، ژ دانپێدانێ پێڤه‌تر چو ددی نه‌مایه 1965،
به‌هیچنا ژیێ جوان 1972، بونه‌وه‌رێن شاهنشینا شه‌ڤێ 1978، دارێن چیمه‌نبویێ 1989.
