لژنا بلندا به‌رهنگاربوونا كۆرۆنایێ هه‌ژماره‌كا بڕیاران ده‌رئێخستن
ئه‌ڤرۆ، حه‌مۆ محه‌مه‌د:
لژنا به‌رهنگاربوونا كۆرۆنایێ ل هه‌رێما كوردستانێ ل دۆر ره‌وشا به‌لاڤبوونا ڤایرۆسێ كۆرۆنایێ دوهی 25/10/2021 كۆم بوو و هه‌ژماره‌كا بڕیاران ده‌رئێخستن و په‌یڤدارێ حوكمه‌تا هه‌رێما كوردستانێ ژی د كۆنگره‌كێ رۆژنامه‌ڤانی دا دبێژیت: پرۆسا خواندنێ ل هه‌رێمێ ل دووڤ رێنمایێن ساخله‌میێ دێ یا به‌رده‌وام بیت و گرێدانا كه‌مامێ ژی ل هه‌موو فه‌رمانگه‌هێن حوكمه‌تێ دێ بیته نه‌چاری.
دكتۆر جۆتیار عادل، په‌یڤدارێ حوكمه‌تا هه‌رێما كوردستانێ په‌یڤدارێ حكومه‌تا هه‌رێما كوردستانێ د وی كۆنگرێ رۆژنامه‌ڤانی دا گۆت: “هه‌كه وه‌لاتی پێگریێ ب رێنمایان نه‌كه‌ن ل وی ده‌می دێ پێرابوونێن تووندتر ل هه‌مبه‌ر هێنه وه‌رگرتن، دیسا هه‌ر ده‌مێ ئاستێ به‌لاڤبوونا كۆرۆنایێ پتر بلندبوو دێ رێكارێن دی گرینه به‌ر”.
دكتۆر جۆتیار عادل خویا ژی كر، لژنێ د كۆمبوونا خوه دا نه‌ه بڕیار بۆ خوه‌پارێزیێ ژ كۆرۆنایێ و زێده‌تر به‌لاڤ نه‌بوونا ده‌رئێخستن، ئه‌و ژی ئه‌ڤه نه:
1- گرێدانا ماسكێ بۆ هه‌موو ئه‌و كه‌سێن ڤاكسین وه‌رگرتین و ئه‌وێن وه‌رنه‌گرتین ل جهێن گشتی دێ بیته نه‌چاری.
2- هه‌موو فه‌رمانبه‌رێن حوكمه‌تێ ب هێزێن ناڤخوه و پێشمه‌رگه‌ی ژی ڤه پێدڤیه د ده‌مێ دو هه‌یڤان دا ڤاكسینێ وه‌ربگرن، به‌روڤاژی ل دووڤ یاسایێ دێ سه‌ره‌ده‌ری د گه‌ل دا هێته كرن.
3- هه‌موو ئه‌وێن د كه‌رتێ تایبه‌ت دا كار دكه‌ن پێدڤیه كارتا ڤاكسینێ هه‌بیت.
4- مامۆستا و فه‌رمانبه‌رێن قوتابخانان و زانكۆ و په‌یمانگه‌هان، هه‌روه‌سا ئه‌و قوتابیێن كو ژیێ وان د سه‌ر 18 سالیێ دابیت، دڤێت هه‌تا 1/12/2021 ڤاكسین وه‌رگرتبیت.
5- دانانا به‌هیان ب هه‌موو شێوه‌یان قه‌ده‌غه‌یه.
6- پێدڤیه مامۆستایێن ئایینی د هه‌ڤكار بن د به‌لاڤكرنا هشیاری و رێنمایێن ساخله‌میێ دا.
7- دایباب دشێن هه‌تا 31/10/2021 بڕیارێ بده‌ن كو زارۆكێن وان بچنه قوتابخانێ یان ب شێوێ ئۆنلاین بخوینن.
8- د كۆر و كۆمبوونان دا دڤێت پشكداران كارتا ڤاكسینێ یان پشكنینا كۆرۆنایێ هه‌بیت.
9- پێدڤییه پۆلیسێن هاتنوچوونێ رێكارێن تایبه‌ت ل سه‌ر شۆفێر و نه‌فه‌ران بجه بینن.
