نڤیسه‌ر ئیسماعیا بادی: د ئه‌ڤ ساله‌دا (7) حه‌فت پرتووكێن من هاتینه چاپكرن
دیدار و به‌رهه‌ڤكرن: درباس مسته‌فا
– نوكه (10) پرتووكێن دی ژ پرۆژه‌یێ چاپ و وه‌شانێ ل به‌ر گه‌ڕا چاپێ نه، لێ چاڤه‌ڕێینه هنده‌ك گوهۆڕین دێ هێنه كرن
نڤیسه‌ر و رۆژنامه‌ڤان ئیسماعیل بادی ژ وان كه‌سانه یێ هه‌رده‌م بكار و براڤ و قه‌له‌مێ پڕ ب به‌رهه‌م ژ بۆ خزمه‌تكرنا په‌یڤ و ره‌وشه‌نبیریا كوردی. ئیسماعیل یێ نڤیسه‌ر چه‌ندین پرتووك گه‌هاندینه چاپێ كه‌تینه د ناڤ كاروانێ ره‌وشه‌نبیریا كوردی دا، د ئه‌ڤ ساله دا ژی ئه‌و كۆمه‌كا پرتووكێن نوو چاپكرینه، و نوكه ژی كۆمه‌كا دی یا پرتووكان ل به‌ر ده‌ستێن وی نه ل هیڤیا چریسكه‌كا رۆناهیێنه ژ ئالیه‌كی كو خوه ب چاپێ را بگه‌هینن. ژ بۆ ڤێ چه‌ندێ و ل دۆر به‌رهه‌مێ وی و كا چ پرۆژه ل به‌ر ده‌ستن، هه‌روه‌سا پرۆژێ چاپكرنا پرتووكان ل ناڤه‌ندا خانی یا ره‌وشه‌نبیری و راگه‌هاندنێ، و چاوانیا هلبژارتن و هه‌لسه‌نگاندنا پرتووكان ل ناڤه‌ندێ و چه‌ندین پرسیارێن دی، مه ئه‌ڤ دیداره ل گه‌ل كریه..
ل دۆر پرۆژێ چاپكرنا پرتووكان و كا كه‌نگی ده‌ستپێكریه، نڤیسه‌ر ئیسماعیل بادی گۆت: ئه‌ڤ ساله پرۆژه‌یی ده‌ست پێكریه، هه‌تا نوكه (24) بیست و چار پرتووك هاتینه چاپكرن، بابه‌تێن هه‌مه جۆرن، لێ پشتی هینگێ ل دووڤ رێنمایان گرنگی ب هنده‌ك بابه‌تان دهێته‌دان. ژ به‌ر كو وه‌كو دیار ناڤه‌ندا خانی پشكه‌كه ژ ده‌زگایێ ره‌وشه‌نبیری و راگه‌هاندنا پارتی، ئه‌و پشته‌ڤانا پرۆژه‌یه، له‌وما پتر گرنگیێ ب بزاڤ و چالاكی و بیره‌وه‌ری یێن پێشمه‌رگه‌یی دده‌ت، هه‌روه‌سا دیرۆكا ده‌ڤه‌رێ و هه‌ر مژاره‌كا گرێدایی بابه‌تێن نه‌ته‌وه‌یی و دۆزا كوردی بن.
ژ بۆ چاونیا هه‌لبژارتن و هه‌لسه‌نگاندن پرتووكا نڤیسه‌ری گۆت: ل سه‌ری مه گۆت چ جۆره په‌رتووكان چاپ دكه‌ین، ئانكو ئه‌ڤێن ئه‌م وه‌ردگرین، دڤێت د وان مژاران دا ده‌رنه‌كه‌ڤن، نوكه مه پتر گرنگی دایه وان مژاران، ژ بۆ هه‌لسه‌نگاندنێ ژی، مه لژنه‌یه‌كا ره‌وشه‌نبیری ل ناڤه‌ندێ هه‌یه و هه‌ر پرتووكه‌كێ ژ لایێ ناڤه‌رۆكێ و رێنڤیسێ ڤه پێدا دچین، هه‌كه تێبینیه‌ك ژی مه هه‌بیت، ب رێیا په‌یوه‌ندیێ ل گه‌ل نڤیسه‌رێ وی راستڤه‌كرن تێدا دهێته كرن و چاپ ده‌ین.
هنده‌ك كتێبێن وی ئه‌ڤه دو جاران هاتنه چاپكرن، ل دۆر ئه‌گه‌رێن چاپكرنا دویێ گۆت: راسته دبیت ئه‌و پرتووك نه‌مابنه ل ناڤ بازاری، هه‌روه‌سا گرنگیا زێده‌كرنا هنده‌ك مژارێن دیتره ل سه‌ر ناڤه‌رۆكا وێ، ئانكو ئه‌و پرتووكا دهێته چاپكرنه‌ڤه، نه پرتووكا چاپا ئێكێ یه، لێ كۆمه‌كا پێزانین و بابه‌تان ل سه‌ر زێده دبن، ئه‌و پرتووكێن دوباره هاتینه چاپكرن وه‌كو (حه‌یرانۆك) ژ لایێ ئه‌نستیتۆیا كه‌له‌پورێ كوردی ڤه، ڤه‌كۆلینه‌كا ئه‌كادیمی یا به‌رفره‌ه مه ل سه‌ر حه‌یرانۆكێ ل سه‌ر زێده‌كریه. هه‌روه‌سا سه‌رجه‌مێ به‌رهه‌مێ شه‌هید سه‌عدوللا ئاڤده‌ل ئه‌و ژی ڤێ دووماهیێ چاپبوویه، مه كۆمه‌كا وێنه‌یێن نوو كرینه تێدا، هه‌روه‌سا پشكه‌كا دیتر كو جارا ئێكێ وه‌سا گرنگی مه پێدایه، ئه‌ده‌بێ نامه نڤیسینێ یه، پتر ژ 15 نامه‌یێن هۆزانڤانی ب ده‌ستخه‌تێ وی تێدانه كو د چاپا ئێكێ دا نه‌بوون، ئه‌ڤه ژی وه‌كو ژانڕه‌كی ئه‌ده‌بی (نامه‌نڤیسین) گه‌له‌كا گرنگه و دچیته د خانا په‌خشان نڤیسینێ دا. لێ مخابن وه‌كو پێدڤی هێشتا د ناڤ ئه‌ده‌بێ كرمانجی دا گرنگی پێ نه‌هاتیه‌دان.
دیسا بادی ژ بۆ به‌رهه‌مێن وی یێن ئه‌ڤ ساله چاپ بووین دبیژت: هه‌تا نوكه د گه‌ل ئه‌وێن دوباره چاپبووین د ئه‌ڤ ساله‌دا دبنه (7) حه‌فت پرتووك هاتینه چاپكرن، ئه‌و ژی (حه‌یرانۆك، مه‌دره‌سه‌یا قوبه‌هان، د. محه‌مه‌د نووری دێرسمی و بانگینا وه‌لاتپارێزێن كورد، مه‌دره‌سه‌یا مایێ، ره‌مه‌زان عیسا د ناڤبه‌را گریێ و گرنژینێ دا، سه‌عدوللا ئاڤده‌ل.. شاعر و پێشمه‌رگه‌ه و شه‌هید، ئه‌حمه‌دێ نالبه‌ند.. كۆمه‌كا ڤه‌كۆلین و گۆتار و دیداران)، یا دووماهیێ هێشتا نه‌گه‌هشتیه ده‌ستێ من و من نه‌دیتیه كو ل به‌غدا چاپبوویه.
ل دۆر پرۆژێ چاپكرنێ و كا دێ هه‌ر یێ به‌رده‌وام بت رۆژنامه‌ڤانی گۆت: نوكه (10) پرتووكێن دی ل به‌ر گه‌ڕا چاپێ نه، دبیت ئه‌و ژی چاپ ببن كو مژارێن ژێكجودانه. لێ به‌رده‌وامیا پرۆژه‌ی، چاڤه‌ڕێینه هنده‌ك گوهۆرٍین بهێنه كرن و پرۆژه ببیته تشته‌ك دیتر..!!
ئسماعیل نڤیسه‌ر ژ بۆ وان پرتووك یان ئه‌و پرۆژه‌یێن ل به‌ر ده‌ستێ وی دبێژت: ب دیتنا من هه‌كه مرۆڤی كاره‌ك وه‌كو پیشه وه‌رگرت، دڤێت به‌رهه‌م هه‌بیت، یان ژی ده‌ست ژ وی كاری به‌رده‌ت و مه‌یدانێ بۆ هنده‌كێن دی بهێلیت. هه‌كه ئه‌ز نڤیسه‌ربم، دڤێت من به‌رهه‌م هه‌بیت!! نڤیسه‌ر ب به‌رهه‌مێ خوه نڤیسه‌ره. ئه‌وێن هه‌تا نوكه مه گه‌هاندینه چاپێ نێزیكی (28) پرتووكانه، چ یێن مه ب تنێ بن، یان ژی پشكداری د گه‌ل هنده‌ك نڤیسه‌رێن دیتر، هه‌روه‌سا نوكه نێزیكی (10) پرتووكێن دیتر د به‌رهه‌ڤن بۆ چاپێ، ب تنێ هنده‌كان پێداچوونه‌كا سڤك پێ دڤێت، دێ چاڤه‌رێی چاپێ بن و جهه‌ك هه‌بیت خوه لێ بكه‌ته خودان.
نڤیسه‌ر و رۆژنامه‌ڤان ئیسماعیل بادی:
ل سالا 1963ێ ل باژێرێ دهۆكێ ژ دایكبوویه، به‌رهمه‌مَ خوه یێ ئێكێ ل سالا 1982ێ ل رۆژناما (هاوكاری) ل به‌غدا به‌لاڤكریه. گۆڤارا (ده‌نگێ مه) ل سالا 1985ێ د گه‌ل چه‌ند هه‌ڤالا ده‌رئێخستی یه. ل 1993 – 1996ێ، چه‌ندین به‌رنامه بۆ ئێزگێ ده‌نگێ كوردستان (رادیۆیا دهۆك) به‌رهه‌ڤكرینه.ل سالا 1998ێ، به‌رنامێ (ده‌نگێن نه‌مر) ل دۆر سترانبێژێن كورد بۆ ته‌له‌فزیۆنا كوردستان، كه‌نالێ ئاسمانی به‌رهه‌ڤ و پێكێش دكر. ئه‌ندامێ ده‌سته‌كا رۆژنامه‌یا (په‌یمان) و كۆڤارێن (نوخازی، گازی، په‌یڤ، رۆژنامه‌ڤانی) بوویه. هه‌روه‌سا سكرتێرێ نڤیسینێ و جێگرێ سه‌رنڤیسكارێ رۆژناما (ئه‌ڤرۆ) بوو. سه‌رنڤیسه‌رێ گۆڤارا (بزاڤا پالا) یا سه‌ندیكا كرێكارێن كوردستانێ/ لقێ دهۆك بوویه. به‌رپرسێ سه‌ندیكا رۆژنامه‌نڤیسێن كوردستانێ / لقێ دهۆك بوویه بۆ ماوێ دو خولا 2001 – 2008. نوكه به‌رپرسێ په‌رتووكخانا ناڤه‌ندا خانی یا ره‌وشه‌نبیری و راگه‌هاندنێ یه. ل سالا
2016- 2017 كۆلیژا په‌روه‌ردا بنیات/ پشكا زمانێ كوردی ل زانكۆیا دهۆكێ ب دوماهی ئینایه. دیسان چه‌ندین به‌رهه‌مێن چاپكری یێن هه‌ین.
