چار چیرۆكێن گه‌له‌ك كورت
ژ نڤیسینا: عامر هیشام ئه‌لسه‌فار *
وه‌رگێڕان ژ عه‌ره‌بی: شه‌مال ئاكره‌یی
پشیكا قه‌له‌و
مێزه‌یه‌ك و كورسیكه‌ك و د ناڤبه‌را وان دا پشیكه‌كا قه‌له‌و هه‌یه.. كامیرایه‌كا ته‌له‌ڤزیۆنی.. گرته‌یێن زیندی یێن خه‌لكی ل سه‌ر ئه‌كرانا ته‌له‌ڤزیۆنێ هه‌نه.. ئاڤاهیه‌ك یێ دهه‌رفیت، چونكی بناغه نه یێ دروسته.. نه‌خوه‌شه‌ك هه‌تا مرنێ یێ دنالیت، چونكی ده‌رمان د سه‌خته نه.. بۆمب دته‌قن و جان ژ جه‌سته‌ی ده‌ردكه‌ڤن، چونكی ئامیرێ پشكنینێ یێ سه‌خته‌یه.. ب تنێ ئه‌و پشیكا قه‌له‌و ژ نیڤا دلێ خوه یا دكه‌نیت و تیقه‌تیقا وێ یه.
2
دیجله
ژ رووبارێ دیجله‌ی پرسین: “چما تو ئه‌ڤرۆ خوه‌نیشادانان ل به‌غدادێ دكه‌ی؟.. چو جاران ئاڤا ته یا هاڤی نه‌بوویه، په‌ڕاڤێن ته د دلڕه‌ق نه‌بووینه، چ ب سه‌ری ته هاتی یه؟.. رووبارێ نه‌مر سه‌رهلدا هه‌تا پێلێن وی یێن تۆره هه‌موو دزێن بیانی بن ئاڤ كرین.
3
قوتابخانه
د پۆلێ ڤه باوشك دهێنه مامۆستای.. قوتابی دكه‌نن.. مامۆستا دنڤیت.. قوتابی یاریان دكه‌ن.. قوتابخانه دهه‌رفیت، وه‌لات ژی دگریت.
4
دز
ل زارۆكینیا خوه هی دزیان ببوو، پارچه‌یێن حه‌لاوه و شریناهیێ ژ زارۆكێن تاخی ددزین.. ده‌ما بوویه سنێله ل بازاڕی فێلبازی ل بازرگانان دكرن و كل ژ چاڤان ددزی.. د فێلبازی و سه‌ردابرن و پیلان و كۆده‌تایان دا بوو بسپۆر.. ل دووماهیێ بڕیارا دزینا وه‌لاته‌كی دا.
* عامر هیشام ئه‌لسه‌فار: نۆشدار و نڤیسه‌ره‌كێ عیراقی یه، ژ دایكبوویێ سالا 1957 یه.. نها ل ده‌ڤه‌را ویلز ل به‌ریتانیا دژیت.
تێبینی: ئه‌ڤ كورته چیرۆكه ب رازیبوونا نڤیسه‌ری ب خوه، ژ په‌یجێ وی یێ فه‌یسبووكی هاتینه وه‌رگرتن.
