توپانێ ب من دكه‌ن.. زارۆك
د. عارف حیتۆ
من نه‌دڤیا بچمه چ نێچیر و ڕاڤان
لێ ئه‌ز یێ بوویمه نێچیرڤان
من حه‌ز ژ تێكهه‌لییا په‌زی نه‌دكر
دناڤبه‌را شه‌ڤ و رۆژێدا من خوه دیت یێ
ل به‌ر كه‌واڵی و بوویمه شڤان
من و زه‌ڤیا ل هه‌ڤ نه‌دكر
ل ئێڤارییا هاڤینه‌كێ، ل ناڤ ڕه‌زه‌كی ژ دایكبووم و
ل به‌ر ڕه‌زی مه‌زن بووم و دگۆتنه من تویی ره‌زڤان
هه‌كو من نه‌ڤیای زۆلمێ بكه‌م
یان ده‌ستێ خوه درێژكه‌مه مالێ خه‌لكی
دگه‌ل كۆمه‌كا ڕێگران بوومه نژده‌ڤان
هه‌ر تشته‌كێ من نه‌ڤیایی، من یێ ڤیایی
و هه‌ر تشتێ من ڤیایی، كه‌فتمه تێدا ب نه‌ڤیایی
خوه ل وی ده‌مێ چوویمه سه‌ر كه‌ڤرێ حسارێ و
من ڤیایی خوه تێدا بهاڤژێم
گیایێ نه‌رم ڤه‌گرتم و له‌مزێن دلێ من ته‌مبوورڤان
ئه‌ڤه پێنجی ساله ب منڤه یا بووی به‌لا ژیان
پێنجی ساله..
خه‌مه‌ك ل سه‌ر سینگێ من ڤه‌دده‌ت، بوویه خاقان
خه‌مێ خوه د ده‌ردۆرێ وه‌ركر
وه‌ك ئاگرێ ب پووشی ڤه چووی، ڤه‌گرت جیهان
دوهییا من خه‌مه
ئه‌ڤرۆیا من خه‌مه
ئاینده‌یێ من خه‌مه
ئه‌ز ب خه‌مێ هشیار دبم و تێشتێ دخۆم خه‌م
ئه‌و نه‌فه‌لێن ب عه‌شوایی ل سه‌رێن ڕێكا دگڕنژن
ره‌شپۆشن و تێكدا بوون خه‌م
ئه‌ز ب خه‌مێ ژ دایك دبم و
ب خه‌مێ گه‌شه دكه‌م و
هه‌ر ب ڤێ خه‌مێ ژی دێ مرم.
هه‌كو من ل خوه مێزه كری، وه‌سا من ددیت
كائینه‌كێ ڕاهه‌ژۆكم ل به‌ر هوڕه‌بای
دكه‌شتیێ دا هه‌رده‌م ئالۆز و هه‌ڤدژم
ب پله‌كێ دبمه هه‌ور و ب ئێكا دی
ژ ئه‌نیا ئاسمانی درژم.
ب په‌یڤه‌كێ دبمه تاری و ب ئێكا دی دبمه فه‌رقه‌د
د چركه‌كێ دا دبمه ئاشتی و د ئێكا دی دا جه‌نگا به‌د
ب نڤێژه‌كێ دبمه عیسا و ب شه‌هده‌یه‌كێ دبم محه‌مه‌د
ئه‌ز ئه‌ڤێ ده‌ڤ ب كه‌ن و ژبن ڤه پڕ فه‌ن
ئه‌ڤێ ب روخساری ڤه ره‌به‌ن
و ب ره‌فتارێ بكوژه‌كێ توند و نه‌په‌ن
ئه‌ڤ هه‌ڤدژییا…
ب من ڤه پێشی و ل به‌ر ده‌رێ مالان كه‌ركه‌ده‌ن
چاڤێن خه‌لكی ئه‌ز خوارم و د هناڤێن وان دا زه‌مه‌ن
ئه‌ڤ زه‌مه‌نێ مشت هه‌ڤدژی و هه‌یڤا عاشق دكه‌ته ره‌ژی
ژانێن بوونا ژیوارینه- ئه‌و ژیوارێ ژ نیهارێ بووی
ته‌ڤ سلاڤێن هێژا و هه‌ژی، ل سه‌ر لێڤێن من دكه‌ته په‌ژی
من دڤیا من چ تشت نه‌ڤێت
من نه‌دڤیا من تشته‌ك بڤێت
وه‌لێ ڤیان و نه‌ڤیانێ… كه‌په‌نه‌كێ هه‌ڤدژیێ كره به‌ر من
زارۆكان پێ دكر توپانێ، ل گۆڕه‌پانێ..!
***
