هنده‌ك رێكارێن شعری
شعر: مه‌حموود ده‌روێش
وه‌رگێران: عارف حیتۆ
هه‌ساران چ رۆله‌ك نه‌بوو
ژبلی هندێ
كو فێری خواندنێ كرم:
من زمانه‌ك ل ئاسمانی هه‌یه
ل سه‌ر عه‌ردی ژی زمانه‌ك
كیمه ئه‌ز؟ كیمه ئه‌ز؟
*
من ل ڤێره به‌رسڤ نه‌ڤێت
دبیتن ستێره‌ك كه‌فتبیته سه‌ر میناكێ خوه
دبیت ژی ب شه‌ڤ دارستانا كه‌سته‌نایێ
ب من ڤه به‌ره‌ڤ هه‌سارێ بلند بوو بیت
و گۆت بیت: دێ ل ڤێره مینین!
*
هه‌لبه‌ست ل سه‌لاله و دشێتن
من فێركه‌ته هه‌ر تشتێ بڤێت
وه‌ك وێ كو په‌نجه‌ره‌یێ ڤه‌كه‌م
كاروبارێن ناڤمالا خوه
دناڤ ئه‌فسانه‌یان دا ب ڕێڤه ببه‌م.
و دشێتن بۆ ده‌مه‌كی…
خوه ل من ماره‌كه‌ت
*
بابێ من ل خوارێیه و زه‌یتوونه‌كێ
هه‌ل دگریتن كو ژیێ وێ هزار سالن،
ئه‌و نه ڕۆژهه‌لاتییه و نه ڕۆژئاڤاییه.
دبیت بێهنا خوه ژبه‌ر فاتحكه‌ران ڤه‌ده‌ت
ئوو پیچه‌كا دلسۆزیێ دده‌ته من و،
سووسنان بۆ من كۆم دكه‌ت.
*
هه‌لبه‌ست ژ من دوور دكه‌ڤیت،
ل به‌نده‌ره‌كێ ده‌ریاڤانان ب ژۆر دكه‌ڤیت
كو عاشقێن شه‌رابێنه و
دو جاران نازڤڕنه ده‌ف هه‌مان ژنێ،
چ خه‌ریبی و دلینیێ بۆ چ تشتی
هه‌ل ناگرن!
*
هێژ ژ ئه‌ڤینیێ نه‌مری مه
وه‌لێ ما تو به‌رێخودانێن كورێ وێ
د قه‌ره‌نفلێ دا نابینی؟
ترسا وێ ل سه‌ر گولدانێیه ژ برینێن وێ،
پاشی دگریێت دا بۆیه‌ره‌كی دوور بكه‌ت
به‌ری ئه‌و بۆیه‌ره بگه‌هیت
پاشی دگریێت كو من ب ساخی، ژ رێكا خه‌فكان
ڤه‌گه‌رینیت، داكو ل ڤێره بژیم
*
هه‌لبه‌ست نیڤ و نیڤه و دشێت شه‌ڤان
ب مه‌مكێن كچكه‌كێ رۆهن بكه‌ت،
دشێت دو له‌شان ب سێڤه‌كێ رۆهن بكه‌ت،
و دشێتن وه‌لاته‌كی ب قێژییه‌كا گاردینیایێ
ڤه‌بگه‌رینیت!
*
هه‌لبه‌ست دناڤ ده‌ستێن من دایه،
دشێتن كو ب كارێن ده‌ستی،
كاروبارێن ئه‌فسانه‌یان ب ڕێڤه ببه‌ت،
لێ ژ وی ده‌مێ من هه‌لبه‌ست دیتی،
من یێ خوه ته‌نگه‌زار كری و
دگه‌ل دپرسم:
كیمه ئه‌ز
كیمه ئه‌ز؟
***
ژێده‌ر:
تدابیر شعریه. دیوان لماژا تركت الحصان وحیدا. الاعمال الجدیده الكامله (1). منشورات دار ریاچ الریس، گ1- 2009. ص؛ 365- 368.
