سه‌رۆك بارزانی ب هه‌لكه‌فتا 52 سالیا رێككه‌فتنا 11 ئادارا 1970 په‌یامه‌ك به‌لاڤكر
هه‌لكه‌فتا 52 سالیا رێككه‌فتنا 11 ئادارێ كو ده‌ستكه‌فته‌كا گرنگ یا بزاڤا رزگاریخوازا گه‌لێ كوردستانێ بوو ب بلندی ساخ دكه‌ین.
ژ ئه‌نجامێ پێداگیری و خۆراگریا گه‌لێ كوردستانێ و شۆره‌شێ، ب رێبه‌ریا بارزانیێ نه‌مر، رژێما ئیراقێ هاته نه‌چاركرن كو ل 11 ئادارا 1970 بۆ جارا ئێكێ و ب شێوه‌كێ فه‌رمی دانپێدانێ ب پشكه‌ك ژ مافێن گه‌لێ مه بكه‌ت.
11 ئاداریا 1970، به‌لگه‌یه‌كا رۆهنه ژ سه‌ركه‌فتنا شۆره‌شێ و ئیرادا ره‌وا یا گه‌لێ كوردستانێ ب سه‌ر نه‌حه‌زێن گه‌لێ كوردستانێ و بزاڤێن وان بۆ ژناڤبرنا گه‌لێ مه. رێككه‌فتنا 11 ئادارێ به‌رهه‌مێ خه‌بات و قوربانیدانا پێشمه‌رگه‌ی و هه‌موو ته‌خ و چین و پێكهاتێن ئاینی و نه‌ته‌وی ییچن كوردستانێ بوو، ئه‌و خه‌باتا ژ پێخه‌مه‌ت به‌رقه‌راربوونا پێكڤه‌ژیانێ و هه‌ڤپشكیێ و دادپه‌روه‌ریێ وئاشتیێ دا به‌رده‌وام بوو و گه‌هشته ئه‌نجام.
راسته پشتی رێككه‌فتنا 11 ئادارێ رژێما رژێما ئیراقێ رێیا په‌یمانشكینیێ گرته‌به‌ر به‌لێ ئیرادا گه‌لێ مه بۆ به‌رده‌وامیا خه‌باتێ و خوه ب ده‌ست نه‌دانێ هه‌ر یا به‌رده‌وام بوو و بۆ ئه‌گه‌رێ بده‌ستڤه‌ئینانا ده‌ستكه‌فتێن مه‌زنتر.
د سالیادا رێككه‌فتنا 11 ئادارێ دووپاتیێ ل په‌یاما ئاشتیخوازانه و پێكڤه‌ژیانا گه‌لێ كوردستانێ دكه‌ین و وێ چه‌ندێ ژی دووپات دكه‌ین كو دبن هه‌ر فشاره‌كێ دا ئیرادا گه‌لێ كوردستانێ ناشكێت و كوردستان ده‌ست ژ ئازادی و مافێن ره‌وا یێن خوه به‌رناده‌ت.
