گه‌میڤانۆ! گه‌میڤانێ من!
والت ویتمان Walt Whitman
وه‌رگێڕان ژ ئینگلیزی: شه‌مال ئاكره‌یی
گه‌میڤانۆ! گه‌میڤانێ من!
گه‌شتا مه ب داوی هات،
گه‌مییا مه ژ ته‌ڤ ئاسته‌نگان ده‌ربازبوو و
ئه‌و خه‌لاتێ مه‌به‌ست ب ده‌ست ڤه هات،
په‌ڕاڤ یێ نیزیكه، ده‌نگێ زه‌نگان یێ دهێته گوهێن من
ته‌ڤ خه‌لك یێ شاده،
ل وی ده‌مێ كو چاڤ ل سه‌متا گه‌میێ نه،
گه‌می ب وێره‌كی به‌ره‌ڤ پێش ڤه دچیت:
لێ، ئاخ هۆ دلۆ، دلوو دلۆ!
دلوپێن سۆر یێن ژێ درژیێن،
گه‌میڤان ل سه‌ر بانێ گه‌میێ یێ ڕازایه
له‌شه‌كێ ساربوویی و ته‌رمه.
گه‌میڤانۆ! گه‌میڤانێ من!
هلۆ رابه و گوهدێرییا ده‌نگێ زه‌نگان بكه
هلۆ رابه ژبۆنا ته ئالا یێن دهێنه نزم كرن
ژبۆنا ته:
بۆقێن ده‌نگ بلند یێن دژه‌نن،
ته‌ڤ قه‌فتێن گولێن خه‌ملاندینه
كنار ژ خه‌لكی دتژینه..
گازی ته دكه‌ن، كۆمێن مرۆڤان یێ دهژیێن،
دێمێن وان یێن شه‌یدا، ل ته دگه‌ڕن،
لڤێره، گه‌میڤانۆ! بابێ گرانبها!
ها ئه‌ڤه ده‌ستێ من بالگێ سه‌رێ ته
ئه‌ڤه هنده‌كه ژ خه‌ونێ، ئه‌و خه‌ونا ل سه‌ر بانێ گه‌میێ
ب ساربوویی كه‌فتی و مری.
گه‌میڤانێ من یێ بێ به‌رسڤه،
لێڤێن وی دهشك و نه‌لڤن،
بابێ من هه‌ستێ ب ده‌ستێ من ناكه‌ت،
نه لێدان و نه شیان ددلێ وی دا ماینه،
گه‌می ب ته‌ناهی و ب ده‌نگه‌ڤه‌دان ڤه گه‌هشت،
گه‌شتا خوه ب داوی ئینا،
گه‌مییا سه‌ركه‌فتی ژ گه‌شته‌كا ب ترس
ب ده‌ستڤه‌ئینانا ئارمانجێ زڤری ڤه.
ئه‌ی په‌ڕاڤێن ده‌ریایێ تلیلییان ڤه‌ده‌ن،
ئه‌ی گه‌لی زه‌نگلان لێ بده‌ن!
ئه‌ز ژی ب گاڤێن خه‌مگین..
لسه‌ر بانێ گه‌میێ كو گه‌میڤانێ من ل سه‌ر یێ رازایه و
ب ساربوویی كه‌فتی و بوویه ته‌رم، په‌یاسه‌یان دكه‌م!
تێبینی:
ئه‌ڤ هه‌لبه‌سته O Captain! My Captain!، وولت وێیتمان (31 گوڵانا 1819ێ – 26 ئادارا 1892ێ) كو ئێك ژ ناڤدارترین هه‌لبه‌ستڤانێن ئه‌مریكی یه ل سالا 1865ێ ل سه‌ر مرنا “ئه‌براهام لینكۆلن”ی، سه‌رۆكێ 16ێ یێ ئه‌مریكی ( 12ی شوباتا ێ1809 – 15 نیسانا 1865ێ) نڤیسی یه. لینكۆلن دهێته نیاسین كو داوی ب شه‌ڕێ ناڤخوه‌یی یێ ئه‌مریكا (1861 – 1965) ئینا و جاره‌كا دی ئێكگرتن بۆ ویلایه‌تێن ئه‌مریكی زڤڕاندییه ڤه.
ژێده‌ر: .(wikipedia)
