ئادار… قورسترین وه‌رزێ ڤیانێ
عارف حیتۆ
ل ئادارێ…
زه‌ڤییه‌كا ته‌خت و كێلایمه، ئاڤز دبم و پڕ دده‌مه‌ڤه
جارنا گه‌نم ل سه‌ر سینگێ من شین دبیت
جارنا ژی هه‌سپێن (فاتحان)،
چاڤێن من دكه‌نه شه‌ڕگه‌ه و سڕ دبمه ڤه!…
*
ل ناڤبه‌را ئادارێ و ئوكتۆبه‌رێ دا
دلێ من هه‌لهه‌لۆكه‌كه دڕ و ئاقویت پێڤه دشۆرن
سترانا من هه‌یڤه‌كا مشتی سیتاڤكه
ل ئاهه‌نگێن تۆڤچینیێ و به‌ردورینێ
هنده‌ك ئاوازێن ڕه‌ش و سپی ل هه‌ڤ دگوهۆڕن
هه‌كو “مارس” تیرێن خوه به‌ردده‌ته چیا و
گوڕی ژ ئاخێ بلند دبیت، مالێن مه پێڤه زه‌ندۆرن
هه‌كو “مارس” تبلێن خوه د عه‌ردی را دچینیت
باران دهێت و گیا شین دبیت
كولیلكێن سپی ب بژی یێن داران ڤه دبرسقن
هه‌ر چوار ده‌ورێن مه بلوورن
په‌ز دخڕیێته به‌ر خوێدانێ و سوار هێدی،
ل سه‌ر مژویلانكێن مه دبۆرن
ژبۆ ئاییردێ ڤیانێ یان خه‌ریبی یا جدیدانێ.
ئه‌ڤه بۆ جارا ئێكێیه هه‌تاڤزه‌رك
ژ بن “مۆمۆ”ی ده‌ردكه‌ڤیت و دبیته ساهی
ته‌ڤ به‌خچه‌یان كره شاهی و گڕنشك دانان
سه‌ر ده‌ڤێ وێ مزگینی یا ل سوباهی!
كه‌وان فڕدانه سه‌ر زووركا و ناڤه‌كێ وه‌ك خودێ كه‌ڤن
ب سینگێ چیای ڤه بۆ كێل و ئێدی نه‌ما
بێتویتك داده‌نه لاندكا و شیرێ خالد
د چیرۆكێن شه‌ڤبێرییان دا ببیته ته‌ڤن.
مه‌مكێ ئاخێ یێ مشت شیره و هه‌ر ئێك ل مالا خوه میره!…
…..
جوتیاران قه‌ست كره جووتی و
ل سه‌ر كه‌ڤرێن گه‌ور نه‌خشاندن په‌یڤێن گۆتی
ستێر ب به‌خچه‌یان ڤه نووسیان و ئۆلدارێن به‌ر په‌رسگه‌هێ
ب ده‌ستێن سه‌رئه‌ڤراز كری، لاڤه دكرن
كو ئه‌لهۆیه‌ك ژ زینێ چیای، یان ژ گوڕییا ئاگری ببیت
شاپه‌ڕێن وی سهێ ل هه‌می زه‌ڤیا بكه‌ت و
چیا ل به‌ر وی كند ببیت…
وه‌غه‌رێن دوور بسوهرینیت
هه‌ر گره‌كێ ب كێنج و باندۆر بڤه‌مرینیت
هه‌ر كاروانێ خه‌ون د هه‌گباندا هه‌لگرتی
بڤه‌ژینیت و بزڤڕینیت
وه‌سا چێ بوو، خودێ دوعا قه‌بوولكرن
ته‌ڤ دویپشكێن ل بای سوار، مه‌لوول كرن
خه‌ونا شرین، ژ شرینی بوو
ڕۆژه‌كا گه‌ش دانا سه‌ر ده‌ستێ ئادارێ و
تامه‌كا خوه‌ش به‌ردا ناڤ ده‌ڤێ ژیارێ.
*
مه‌همه‌د ڕه‌شا… گۆپالێ خوه هه‌لگرت و كوریا بای گرت. عه‌ورێن سپی ب چه‌پ و راستان دا برن، ده‌رێن ئاسمانی ڤه‌كرن، تیڕۆژكێن ڕۆژا سۆر ژبۆ چریێ مشتانه كرن. دناڤبه‌را ئادارێ و چرییا بچووك دا، زه‌ڤی یێن گه‌نمی و ڕه‌زێن ڕه‌شمێوێ پۆسیده، ب هه‌لامه‌تێن سته‌مدیده، كرنه حه‌یرانێن گه‌ڕیده… ما دێ هه‌تا كه‌نگی جۆبڕكان سه‌رێ ده‌زی ڤێ بیت؟ ما دێ هه‌تا كه‌نگی چیرۆكا عه‌شقێ گرێ بیت؟!… من گوله‌ك ژ باغێ ئیره‌می چنی و ب گوهێ خاتوونا فه‌خراڤه كره پنی.. ئه‌ڤه ژ مێژه‌یه ئه‌ز بارانێ ل خاتوونێ دبارینم و هه‌ناسا خوه، وه‌كو گولاڤ ل پرچا وێ د ڕه‌شینم. ئه‌ز ژی وه‌ك وه عاشقه‌كێ فاشل بووم و پێڕابوونه‌كا باگل بووم. د دیدارێ دا ساویلكه‌یه‌كێ ب دلینیێ، كامل بووم و دره‌وینه‌كێ ب ئاقل بووم. ئه‌م هه‌ردو ل ئاسمانان ب تنێ و گه‌هینا مه چ ڕێ ناچنێ.
ئه‌م نه ئه‌م بووین، لێ ل ئادارێ ئه‌م ئه‌مین!…
*
