باژێرێ جلوبه‌رگا
كورته چیرۆك
نڤیسین: ملله‌ت محه‌مه‌د
د باژێره‌كێ دا، ساكۆیه‌ك و په‌نته‌رۆنه‌ك ژ بێ كاری ل به‌ر دیواری د ڕوینشتی بوون، ساكۆ د هزرا دا نوقوم ببوو، د ده‌مه‌كێ دا هزره‌ك بو چێ بوو كو بۆ ده‌مه‌كێ ژ باژێری ده‌ربكه‌ڤت و به‌ره‌ڤ چیایی بچت، گۆته په‌نته‌رۆنی من ببه چیای.په‌نته‌رۆن ڕابوو ل سه‌ر خوه و ئه‌و لێ سوار بوو. پشتی گه‌هشتینه نیڤا چیایی، ل پشت كه‌ڤره‌كێ مرۆڤه‌كێ ڕویس دیت و یێ ب توڕه‌ی ڤه به‌را ژ چیای به‌ردته خوارێ. ساكۆی گۆتێ: بۆچی تو یێ توڕه‌یی.؟ گۆت: جلوبه‌رگێن من ئه‌ز هێلام و چوو، چونكو بۆ ده‌مه‌كێ ئه‌ز مامه د كانیه‌كێ دا. ساكۆی گۆتێ: خه‌مگین نه‌به، مه بكه به‌رخوه. ئه‌وی په‌نته‌رۆن كره به‌رخوه و دویڤ دا ساكۆ، لێ ساكۆ بو وی یێ ته‌نگ بوو ، ب زۆری كره به‌رخوه. ساكۆی گوتێ هێدی ته بن كه‌فشێ من دڕاند. پشتی قولپك گرتین مه‌شكا وی دیار دكر. ساكۆی گۆتێ قولپكا ڤه‌كه هوسا هه‌ناسه‌یا من كورت بوو. پاشی گۆتێ ناڤێ ته چییه.؟ گۆت: چیایی یه. گۆتێ: دا ژ چیایی بچن خوار لێ پێدڤییه تو د ناڤ باژێری دا ناڤێ خوه ب گوهوڕی و بكیه باژێری. چیایی ڕازی بوو و پێگڤه چوونه دناڤ باژێری دا، دیت باژێر تژیه ژ جلوبه‌رگێن ڤالا، بۆ جلوبه‌رگا سه‌یر بوو پشتی ئه‌و دیتی، هه‌می ژ بو وی چوونه كرنۆشێ. پترییا ساكۆیا ژ په‌نته‌رۆنێن خوه كه‌ڤتن، ده‌مێ چووینه كرنۆشێ. چاڤێن چیایی ب هنده‌ك جلوبه‌رگێن ماركه كه‌ڤتن، ئێكسه‌ر یێن ل به‌ر خوه ئێخستن و كرنه د زبلدانێ دا و یێن ماركه كرنه به‌رخوه، پاشی پله‌ك ل ساكۆیێ خوه یێ نوی دا و گۆت: ژ ئه‌ڤرۆ پێڤه ئه‌ز باژێریمه یێ كه‌ڤن بت دێ وی دڕینم.
